Governu Timor-Leste

Governu Liu hosi Sekretaria Estadu Konsellu Ministru Ho Institutu  Nasionál Linguístika (INL), entrega Surat-Tadak Tuir Kursu (sertifikadu) Lian-Tetun Padronizada ba Funsionáriu Públiku nain 29, iha loron 22, fulan Dezembru 2011, iha Palásiu Governu, Díli.

Funsionáriu sira ne’e servisu iha área komunikasaun sosiál Governu nian, ne’ebé mai hosi, Sekretaria Estadu Konsellu Ministru funsionáriu hamutuk nain 15, Sekretaria Estadu Defeza, nain ida, Sekretaria Estadu Seguransa, nain ida, Sekretaria Estadu Polítika Enerjétika nain ida, Ministériu Agrikultura no Peska, nain haat, Ministériu Turizmu Komérsiu no Industria, nain rua, Ministériu Infraestrutura, nain ida, Ministériu Edukasaun, nain rua, Ministériu Justisa, nain ida no Ministériu Solidariedade Sosiál funsionáriu nain ida.

Diretór Jerál institute Nasionál Linguístika (INL), Benjamin de Araújo e Corte-Real, Hatuir katak “institutu Nasionál Linguístika hetan fiar hosi dekretu Governu nian Nu.1/2004 fulan Abril, atu bele dezenvolve lia- tetun, tanba iha joven barak ne’ebé iha esperiénsia hosi Nasaun balu bele dezenvolve lia-tetun atu iha regras ne’ebé di’ak ba futuru. Nia husu mós ba formandu sira ne’ebé simu ona surat-tadak tuir kursu ne’e atu buka aprende di’ak liutan hodi hakerek lia-tetun tuir ninia ortografia lolos”.

Prezidente Komisaun Funsaun Públika, Libório Pereira, hateten katak, ho onra tebtebes dala ida tan mai iha fatin ida ne’e, atu partisipa iha serimonia graduasaun konkluzaun ba kursu liuliu ba funsionáriu sira ne’ebé depois atu sai hanesan manu ain administrasaun públika nian, hodi haklaken informasaun atividade tomak ne’ebé la’o iha administrasaun públika ba públiku, ita bolu komunikasaun sosiál, nu’udar reponsavel máximu ba administrasaun públika iha funsaun públika  sente orgullu maibé hakarak  fó liu tan enfraje katak informasaun ne’ebé funsionáriu sira tenke tatoli ba públiku tatoli ho responsabilidade konserteza ho matenek no badaen, bainhira tatoli ho Lian Tetun tenke tatoli para ita nia komunidade ne’e kompriende saida maka ita hato’o, tanba ne’e Ha’u mós sei aprende hela tetun,tanba tetun padronizada, ita rona tuir saida maka ita dezenvolve to’o agora lia-tetun ne’e la’o hamutuk  ho Portugés

Visé Primeiru-Ministru José Luís Guterres ,apresia no louva tebetebes ba institutu nasionál linguistika no sekretariu estadu Konsellu Ministru ho   inisiativa ida  ne’ebé di’ak tebes,tanba lian Tetun  halo parte iha  ita nia identidade nasional Timor-Leste nian,tanba tuir konstituisaun ita tenke dezenvolve ita nia lian Ofisial,no kontribuisaun ne’ebé hosi Institutu nasionál Linguistika bele refleta ho hakbiiit liu tan ita nia funsionáriu sira nia kapasidade ho aprende lian tetun,tanba iha nasaun barak mós hala’o formasaun sira hanesan mós ita nian.

Marka Prezensa Iha Serimónia Fahe Sertifikadu ne’e Visé Primeiru Ministru, José Luís Guterres, Sekretáriu Estadu Konsellu Ministru, Ágio Pereira, Prezidente Komisaun Funsaun Públika, Libório Pereira, Diretór Jerál Institutu Nasionál Linguístika, Benjamin de Araújo Corte-Real, no Diretór Jerál Hosi Ministeriu no Sekretaria Estadu sira ne’ebé formandu sira servisu ba.