Sorumutu Konsellu Ministru iha loron 28 fulan Dezembru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Konsellu Ministru iha loron 28 fulan Dezembru tinan 2011
Konsellu Ministru hala’o tiha sorumutu iha kuarta-feira, loron 28 fulan Dezembru tinan 2011, iha Sala Sorumutu Konsellu Ministru, iha Palásiu Governu, iha Díli, no aprova tiha:
1.Alterasaun ba datolu Lei Eleitorál ba Parlamentu Nasionál no Lei Eleitorál ba Prezidente Repúblika nian
Alterasaun ne’e, tuir forma proposta lei, ne’ebé mak destina atu introduz dispozisaun finál hodi esklarese kona-ba ezersísiu direitu ba votu timor oan sira nian iha estranjeiru sei la aplika ba aktu eleitorál sira ne’ebé mak sei hala’o iha 2012.
Konsellu Ministru mós análiza:
1.Pontu Situasaun Preparasaun ba Eleisaun tinan 2012
Iha segimentu sorumutu Konsellu Ministru iha loron 21 Dezembru fulan ikus nian, ne’ebé mak Governu rona pontu situasaun ba preparasaun eleisaun prezidensiál no parlamentár tinan 2012 nian, liu tiha semana ida, Sekretáriu Estadu Reforma Administrativa, Florindo Pereira, hamutuk ho Diretór-Jerál Sekretariadu Tékniku Administrasaun Eleitorál (STAE), Tomás Cabral, no elemento Komandante Polísia Nasionál Timor-Leste (PNTL) sira, halo espozisaun ida kona-ba servisu ne’ebé mak dezenvolve hela atu garante susesu ba aktu eleitorál rua iha tinan oin mai. Komisaun Nasionál Eleisaun (KNE) partisipa mós iha sorumutu ne’e.
Konsellu Ministru iha ona koñesimentu ba kalendáriu operasaun eleitorál sira kona-ba eleisaun Prezidente Repúblika, ne’ebé elabora husi STAE, verifika tiha ona katak hanesan ho lei eleitorál no iha kondisaun atu publika tuir lei ne’e.
Iha ámbitu preprasaun lojístika ba operasaun prosesu eleitorál, Konsellu Ministru transfere ona ba STAE observasaun hotu-hotu kona-ba, sujestaun no rekomendasaun ne’ebé konsidera pertinente.
