Sorumutu Konsellu Ministru iha loron 21 fulan Dezembru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Konsellu Ministru iha loron 21 fulan Dezembru tinan 2011
Konsellu Minstru hala’o Sorumutu Kuarta-feira ne’e, iha loron 21 fulan Dezembru tinan 2011, iha Sala Sorumutu Konsellu Ministru, Palásiu Governu Dili no aprova ona:
1. Toleránsia de Pontu ba loron 26 fulan Dezembru tinan 2011 no loron 2 fulan Janeiru tinan 2011
IV Governu Konstitusionál Timor-Leste deside ona hodi konsidera toleránsia de pontu iha loron 26 fulan Dezembru tinan 2011 no loron 2 fulan Janeiru tinan 2012, durante loron tomak, ba funsionáriu no ajente hotu-hotu ministériu sira nian ka servisu dependente sira, nune’e mós ba institutu no organízmu sira integradu iha administrasaun indireta Estadu nian.
Desizaun ne’e ho baze ba Lei n.o 10/2005, iha loron 10 fulan Agostu, ne’ebé determina loron feriadu nasionál sira, data ofisiál komemorativa no toleránsia de pontu, no desizaun ne’e bazeia ba konsiderasaun festa família nian ne’ebé sei selebra iha kuadra festiva ne’e, no tuir tradisaun konsagra tiha ona hanesan reuniaun ba membru família hotu nian, ne’ebé marka ho festividade no serimónia relijioza.
Konsellu Ministru mós analiza:
1. Pontu situasaun Preparasaun ba Eleisaun tinan 2012 nian
Ministru Administrasaun Estatál no Ordenamentu Teritóriu nian (MAEOT) Arcângelo Leite, no Diretór Jerál Sekretariadu Tékniku ba Administrasaun Eleitorál (STAE) Tomás Cabral, halo aprezentasaun detallada ida kona-ba dezafiu boot kona-ba ba preparativu ba eleisaun prezidensiál no lejizlativa iha tinan 2012, hodi bele garante nia susesu.
