Grupu Muller Parlamentar Timor Leste (GMPTL), ho CAUCUS Hala’o Konferénsia Nasionál durante loron rua hahú hosi loron 5 to’o 6, fulan Dezembru tinan 2011, iha salaun Delta Nova, ho tema ‘’Ho Feto nia Lideransa Lori Ita ba Pás no Estabilidade”.
Prezidente Feto Parlamentar Timor-Leste, Deputada Josefa Pereira, hatete katak, “Konferénsia nasionál ida ne’e hanesan rezultadu hosi prosesu ne’ebé hahú hosi Sorumutu nasionál atu promove lideransa no partisipasaun feto iha eleisaun, tinan 2012 nian, ne’ebé ami hala’o liu tiha ona iha loron 7 to’o 8, fulan Novembru liubá, hodi diskute estratéjia atu aumenta partisipasaun feto iha eleisaun, tinan 2012. Nomós atu kandidata an no ezerse sira nian direitu ba votu, aleinde diskute estratéjia, partisipante sira mós debate kona-ba difikuldade ne’ebé feto sira hetan atu bele partisipa iha vida polítika.”
Lideransa Feto Parlamentar ne’e mós hatutan tan katak, konferénsia nasionál ne’e atu kontribui ba fortalesimentu prosesu promosaun lideransa no partisipasaun feto nian iha eleisaun tinan oin, ne’ebé sei mai liu hosi dezenvolvimentu no planu estratéjiku ida atu permiti dezenvolve atividade ho maneira ida ne’ebé efikás liu, atu nune’e bele aumenta lideransa no partisipasaun feto iha politika.
Iha fatin hanesan Sekretáriu Estadu Konsellu Ministrus, Agio Pereira, ne’ebé reprezenta Primeiru-Ministru, Kay Rala Xanana Gusmão, iha diskursu hato’o mós parabéns ba organizadór sira tanba prodús ona esbosu ‘Planu Estatéjiku atu hakbiit lideransa no partisipasaun feto, iha Esbosu ne’e atu hakbiit Lideransa no partisipasaun feto nian, iha eleisaun tinan 2012 no mós ba futuru tenke iha debate maka’as labele formaliza de’it.
“Hanoin de’it ba eleisaun lejislativa, tinan 2012 ita bele husu oin sá tan? Oin sá loos mak ita bele hasa’e liután feto nia kbi’it? Ita labele haluha katak iha eleisaun 2012, eleitoradu boot liu uluk, totál votante elijível sei liu rihun atus ne’en ruanulu resin, hosi totál ida ne’e feto de’it sei to’o rihun atus tolu katak 46%,” hateten Agio Pereira.
Iha Fatin hanesan reprezentante Sekretáriu Jerál ONU iha Timor-Leste, Ameerah Haq, haktuir katak, Ha’u haksolok atu rona notisia katak feto hosi partidu polítiku 15 asina tiha ona plataforma polítika ida ba eleisaun 2012, progresu ida ne’e fó sinal importante atu tau matan ba kestaun nasionál ne’ebé boot ohin loron nian.
Ameerah Haq hatutan “Ha’u kongratula gabinete Sekretaria Estadu Promosaun Igualdade hodi fasilita buat ida ne’e, iha knaar ne’ebé ho valór ás tébes iha dezenvolvimentu Timor-Leste nian ba pás no estabilidade.
Marka prezensa iha konferensia ne’e Sekretariu Estadu Konsellu Ministrus, Agio Pereira, Prezidente Muller Parlamentár Timor-Leste, Deputada Josefa Pereira, reprejentante Sekretáriu Jerál ONU iha Timor-Leste, Ahmerah Haaq, Vise SRSG iha Timor-Leste, Finn Reske-Nielsen, Komisáriu UNPOL, Luis Carrilho, Lider partidu polítiku, feto, xefe suku, Membru Rede Feto no Akadémiku sira.