Ministériu Saúde iha loron 1 fulan Dezembru 2011, komemora loron mundiál ba moras HIV/SIDA, ne’ebé konsentra iha Eskola Primária Santu Domingos Sávio, distritu Baucau.

Ministru Saúde, iha ninia diskursu hateten dezde moras ne’e mosu iha tinan rihun ida atus sia ualu nulu resin ida (1981) to’o agora seidauk iha ai-moruk ida ne’ebé bele kura moras ne’e. Nelson Martins fortifika tan katak kuaze iha nasaun hotu iha mundu iha moras ida ne’e, agora daudaun Timor-Leste rasik iha ona risku ba moras ida ne’e no konsege hamate ita nia komunidade balun.

Tan ne’e nia apela ba públiku katak, ba maluk sira ne’ebé hetan ona moras ida ne’e (AIDS) keta laran susar tanba Governu nunka halo diskriminasaun ba ninia sidadaun rasik no sempre hakuak ema hotu no husu ba sira atu hakbesik-an ba fasilidade saúde hodi hetan asisténsia tanba nasaun ida atu sai forte presiza ninia sidadaun ne’ebé saúdavél.

Iha fatin hanesan, Reprezentante Organizasaun Mundiál ba Saúde (OMS), Mário Luna, realsa katak moras HIV/AIDS hamate ona ema tokon ba tokon iha mundu tomak no ninia impaktu boot tebes ba sosiedade sivil tanba ne’e husu atu ita hotu tenke kuidadu an tanba bele fó impaktu negativu ba Nasaun Foun ida ne’e no OMS prontu atu apoia nafatin Timor-Leste hodi kombate moras HIV/ Sida iha situasaun hirak ne’ebé mak presiza.

Administradór Distritu Baukau António Guterres, iha  ninia intervensaun hateten haree ba numeru  moras HIV/AIDS ne’ebé agora dadaun afeta ona mós ba komunidade Distritu Baukau, ne’ebé sai hanesan Distritu ne’ebé afetadu ho numeru tolu (3) depois Díli no Maliana, tanba ne’e husu ba komunidade hotu Distritu Baukau atu ba teste hodi hatene sira nia kondisaun.

Dadus ne’ebé Media Ministériu Saúde hetan hosi Komisaun Nasionál Luta Kontra HIV/SIDA (KNLH)  ne’ebé servisu hamutuk ho sistema imformasaun Ministériu Saúde relata katak totál kazu HIV/AIDS iha Timor Leste hosi tinan 2003 to Marsu 2011 hamutuk 228 kazus kompostu hosi Mane 112 feto 116. kazus sira ne’e maioria afeta ema hosi tinan sanulu resin lima (15) to haat nulu (40).

Komemorasaun ne’e hetan partisipasaun máximu hosi Ministru Saúde Nelson Martins, Dr. Mario Luna Reprejentante WHO iha Timor-Leste, Pe. Domingos Pinheiro, Vigáriu Jerál Dioseze Baucau, Administrador Distritu Baukau Antonio Guterres, Komandante PNTL Distritu Baukau, Reprezentante F-FDTL, Ajénsia Nasoens Unidas, Caritas Baucau, Komunidade, Estudante inklui mós funsionáriu hosi Ministériu Saúde nian.