Sorumutu Konsellu Ministru loron 30 fulan Novembru 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Konsellu Ministru loron 30 fulan Novembru 2011
Konsellu Ministru hala’o tiha sorumutu iha Kuarta-feira semana ne’e, loron 30 fulan Novembru 2011, iha Sala Sorumutu Konsellu Ministru, iha Palásiu Governu, iha Díli, no aprova ona:
1. Dekretu-Lei ne’ebé aprova Rejime Jurídiku Ensinu Tékniku-vokasionál
IV Governu Konstitusionál defende dezenvolvimentu formasaun profisionál no profisionalizante hanesan forma ida atu moderniza edukasaun iha Timor-Leste. Dezenvolvimentu ne’e liu husi apoiu ba implementasaun rede eskola profisionál nian ida, ho inisiativa lokál, ho aproveitamentu hala’o hosi rekursu sira ne’ebé disponível iha departamentu oioin Estadu nian.
Medida ne’e hanesan resposta ida ba nesesidade kona-ba hasa’e kualifikasaun rekursu umanu iha País ne’e.
Objetivu no programa formasaun ne’ebé atu dezenvolve iha eskola profisionál sira konsidera mós normas no padraun internasionál sira, ne’ebé relasiona kedas ho nível hirak aprendizajen ne’ebé alkansa tiha ona, sein prejudika ajustamentu ruma ne’ebé mak revela katak presiza durante períodu ida tranzisaun nian.
