Lansamentu kampaña ativizmu kontra violénsia hasoru feto
Sekretaria Estadu Promosaun Igualdade (SEPI) ho parseria sosiedade sivil, iha loron 25 Novembru 2011 iha eis-Merkadu, Lospalos, distritu Lautém, lansa tiha ona kampaña Loron 16 (hahú hosi loron 25 Novembru to’o loron 10 Dezembru tinan 2011) Ativizmu Kontra Violénsia Hasoru Feto, ho tema “Dame hosi Ha’u, Dame Iha Família, Dame ba ita hotu”.
Sekretária Estadu, hateten katak, ho orgullu tanba subdistritu Lospalos mós hetan oportunidade boot hosi nivél nasionál atu halo kampaña loron 16 ativizmu hapara violénsia kontra feto.
Sekretária Estadu informa tan katak kampaña hanesan inisiativa mundiál ida atu tenta hasa’e koñesimentu iha nivél lokál, nasionál no internasionál kona-ba violénsia hasoru feto hakbiit rede lokál, halo ligasaun entre ativizmu lokál no mós ativizmu mundiál.
“Ita mós sei konsentra hodi esforsu hodi kria ka halo konsensializasaun ida ne’ebé boot hodi hatene problema ida, ne’ebé liu hosi diálagu, sosializasaun nu’udár oportunidade ida atu reflete ita nia família, husu ba ita an oinsá violénsia haree hosi parte valór, kultura no mós istória”, tenik Nia.
Vise Prezidente Parlamentu Nasionál, Maria Paixão hateten katak, “ohin ita lansa programa ida ne’ebé importante tebetebes iha ita nia nasaun, ita boot sira hatene katak ita la’ós de’it iha loron ohin mak ita halo kampaña loron 16, maibé ita tenke halo loroloron, responsabilidade ita hotu ninian, sidadaun Timor-Leste tomak iha responsabilidade ida ne’e atu hasa’e mós hosi ita-nia mentalidade violénsia ne’ebé ita halo kontra feto”.
Vise Reprezentante Espesiál ONU iha Timor-Leste, Finn Rieske Nielsen, hateten katak, kampaña ne’e sai nu’udar selebrasaun ida no oportunidade kapas ida tanba presiza atu halo kampaña ne’e mós hodi halibur ita hotu hodi hametin fila fali ita-nia kompromisu ba ita-nia esforsu sira atu hapara violénsia kontra feto no labarik feto iha TL.
Administradór distritu Lautém, Jeferino dos Santos Sequeira, hateten katak, kampania ba sosializasaun atu bele habelar informasaun ba komunidade no Ita hotu iha nia obrigatoriu ho konsénsia atu lori informasaun sira ne’e ba ita nia komunidade liuliu ba iha Distritu Lautém atu nune’e objetivu hosi kampaña ida ne’e bele atinzi ninia meta ka objetivu.
Atividade kampaña loron 16 ne’e SEPI organiza hamutuk ho organizasaun sosiedade sivil sira hanesan Asosiasaun Mane Kontra Violénsia (AMKV), FOKUPERS, Fundasaun Alola, Grupu Feto Foinsae Timor Lorosae (GFFTL), PRADT, no seluk-seluk tan no mós ajénsia ONU nian.
Durante loron 16 kampaña ne’e, iha atividade oin-oin ne’ebé sei hala’o iha Distritu sira mak Lospalos, Vikeke, Dili, Baukau, Oekusi, Aileu, Manufahe, Manatutu no mós Likisa. No orsamentu ba kampaña ne’e hamutuk dolár 50.000, ne’ebé hosi SEPI rasik dolár 15.000 no apoiu hosi UNFPA no MDGs Fund hosi Governu España hamutuk dolár 35.000.
