Diskusaun no votasaun ba Proposta de Lei n.^o 54/II Orsamentu Jerál Estadu (OJE) ba 2012 remata iha Sexta-feira, loron 25 Novembru, iha Parlamento Nasionál, hodi ikusmai hetan aprovasaun.

Diploma ne’ebé Governu Konstitusionál da-IV hato’o ne’e hetan modifikasaun tanba iha aprovasaun hosi deputadu sira kona-ba proposta alterasaun balun. Proposta hirak hato’o ne’e hamutuk 141, ne’ebé mak hetan análize durante loron 13 hala’o debate no votasaun iha Parlamentu Nasionál, hafoin rona tiha responsável ministériu nian sira iha Komisaun Espesializada Permanente.

Tuir proposta hirak hato’o hosi deputadu sira, katak despeza sira diminui ba osan tokon $89 kona-ba proposta ne’ebé mak aprezenta hosi Governu.  Aprova  ona aumenta tan osan dolar tokon sanulu liu hosi tusan ne’ebé mak prevee tiha ona, hanesan alternativa ida bainhira hasai osan hosi Fundu Minarai nian. Parlamentu Nasionál atribui mós osan tokon ida atus lima ba UNESCO tanba país balun retira ona sira nia apoiu ba instituisaun tanba admisaun Palestina nian. Ho atribuisaun apoiu ne’e, Timor-Leste rekoñese papél importante UNESCO nian ne’ebé mak nia hala’o ba dezenvolvimentu país nian.

Nune’e mak total dotasaun ba orsamentu hamutuk $1,674,130.000 (tokon rihun ida atus neen hitunulu resin haat rihun atus ida tolonulu dólar amérika.

Dotasaun ba orsamentu tuir kategoria despeza nian mak hanesan tuir mai ne’e:

1 – $140 (tokon atus ida haatnulu dolar amerika) ba Saláriu no Vensimentu

2 – $376,268 (tokon atus tolu hitunulu resin neen no rihun atus rua neennulu resin ualu dólar amérika) ba Bens no Servisu

3 – $199,579 (tokon atus ida sianulu resin sia no rihun atus lima hitunulu resin sia dólar amérika) ba Transferénsia Públika;

4 –$42,917 (tokon haatnulu resin rua no rihun atus sia sanulu resin hitu dólar amérika) ba Kapitál Menor

5 –$915,295 (tokon atus sia sanulu resin lima no rihun atus rua sianulu resin lima dólar amérika) ba Kapitál Dezenvolvimentu.

Osan ba Infra-Estrutura nian hamutuk $761.000.000 (tokon atus hitu neenulu resin ida dólar amérika), maibé ba Fundu Dezenvolvimentu Kapitál Umanu hamutuk  $ 30.000.000 (tokon tolunulu dólar amérika).

Lei ba OJE ba tinan 2012 hetan aprovasaun ikusliu, ho votasaun final global ho votu a favór 39, votu hirak kontra 20 no abstensaun 1.

Testu final Komisaun C – Ekonomia, Finansa no Anti-Korrupsaun Parlamentu Nasionál nian mak sei hakerek  molok atu haruka ba Prezidente Repúblika hodi hetan promulgasaun.