Sekretaria Estadu Promosaun Igualdade (SEPI) ho organizasaun feto partidu politiku sira, iha loron 22 Novembru iha salaun Delta Nova, asina tiha ona plataforma polítiku feto ba eleisaun parlamentár 2012-2017.

Plataforma ne’e ho tema espésifiku hitu ne’ebé  mak hanesan, feto ho edukasuan, feto ho ekonomia, feto ho saúde, feto ho polítika, feto ho justisa, pás no seguransa, feto ho kultura no feto ho média.

Sekretária Estadu Promosaun Igualdade, Idelta Rodgrigues, hateten katak, iha inisiativa barabarak ne’ebé SEPI halo ho organizasaun feto ho sosiedade sivil, atu asegura partisipasaun feto iha vida polítika, liu-liu ita hotu hatene katak, festa demokrátika ne’ebé ita hotu, povu ne’ebe sei sai sasin atu fó ita-nia votu ba iha eleisaun rua, mak iha eleisaun prezidensiál no mós parlamentár.

“Ha’u agradese ba servisu ba elaborasaun ezbosu ne’ebé ita halo iha fulan rua nia laran, ita hatene katak ita iha partidu polítiku 22, maibé partidu polítiku balun karik la marka prezensa maibé sira fó tiha ona sira ninia kontribuisaun, opiniaun katak sira hotu aseita asina ezbosu finál ida ne’e, ne’ebé ita hotu sai sasin ba asinatura dokumentu ida ne’e nu’udar plataforma feto iha polítika”, informa Idelta Rodrigues.

Sekretária Estadu esplika katak plataforma ne’e la’ós foin mak dala ida ne’e, iha 2007 ita iha ona plataforma ida, agora ita ajusta fila fali, ármoniza ba situasaun reál ne’ebé agora daudauk ita enfrenta, ita iha mudansa barak tanba iha buat barak mak ita muda, ita ajusta tiha ona, ida ne’e konkordánsia ida ne’ebé mai hosi  partidu polítiku ruanulu-resin-rua.

“Ha’u espera katak ita hotu asina, ita lori fila fali ba ita nia partidu ida-idak atu fó hatene ba ita nia prezidente partidu, estrutura, dehan katak, ida ne’e mak plataforma feto iha partidu polítiku, labele ita simu, ita asina tiha, ita ba rai de’it, ita la halo mudansa, entaun mudansa ne’e tenke mai hosi ita feto, ita tenke halo uluk hodi ita dada mane sira atu hamutuk ho ita fortifika papél servisu ne’ebé ita halo”, tenik Sekretária Estadu.