Sorumutu Estraordinária Konsellu Ministru iha loron 19 fulan Novembru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
.............................................................................................................................................
KOMUNIKADU IMPRENSA
Sorumutu Estraordinária Konsellu Ministru iha loron 19 fulan Novembru tinan 2011
Konsellu Ministru hala’o sorumutu estraordinária iha Sábadu, loron 19 fulan Novembru tinan 2011, iha sala Sorumutu Konsellu Ministru, iha Palásiu Governu Dili no aprova ona:
1. Dekretu-Lei ne’ebé mak aprova Estatutu Karreira Dosente Universitária
IV Governu Konstitusionál, sensível ba nesesidade kona-ba ezisténsia kuadru timor-oan sira ho kualidade iha Ensinu Superiór, ne’ebé mak estimula dezenvolvimentu ekonómiku, sosiál no kulturál nasaun nian, konsidera importante ba implementasaun kuadru legál ida ne’ebé mak regula Instituisaun Ensinu Superiór no karreira espesiál dosénsia nian no investigasaun iha instituisaun sira ne’e.
Nune’e, diploma ne’e estabelese direitu no obrigasaun sira ba sira ne’ebé hakarak tuir karreira profissional dosente, hodi kompensa valór husi nia servisu tuir dedikasaun no esforsu ba benifísiu Universidade nian.
2. Proposta Lei kona-ba Autorizasaun Lejislativa iha Matéria Ambientál
Timor Leste nu’udar nasaun insulár no kosteiru, iha ambiente oin-oin barak tebe-tebes no tasi, ho fauna no flora rasik ne’ebé Estadu tenke proteje no konserva.
Solusaun sira ne’ebé tau iha diploma ne’e iha konsiderasaun ba prinsípiu jerál protesaun ambiente nian, instrumentu internasionál oin-oin ne’ebé hetan ratifikasaun tiha ona husi Timor-Leste no sirkunstánsia ekonómika, sosiokulturál balun no insularidade País nian.
Proposta Lei autorizasaun ne’e elabora ona ho suporte tékniku Programa Nasoens Unidas nian ba Ambiente no konta ho realizasaun prosesu ida kona-ba konsulta públika hamutuk ho entidade governamentál ne’ebé relevante ho organizasaun la’ós-governamentál sira.
