Ministériu Agrikultura no Peska (MAP) komemora Loron Mundiál ba Aihan ne’ebé monu iha loron 16 fulan Outubru, ho tema “Reafirma Kompromisu atu hasa’e Produtividade no Diversidade Aihan”. Atividade komemorasaun nian ne’e hala’o iha loron 20 to’o 21 Outubru.

“Ohin loron ida ne’ebé importante ba ita atu komemora loron mundiál ba aihan no halo reflesaun katak aihan ne’e importante tebe-tebes ba moris ema hotu nian, ida ne’e sai hanesan direitu ida ba ema ida-idak iha mundu no sorumutu ida ne’e hanesan parte ida hosi atividade hodi komemora loron ne’e no  ita-boot sira-nia partisipasaun iha ne’e fó valór ba loron ida ne’e katak Timor-Leste mós tau fó importánsia ba aihan. Aleinde ne’e iha ita-nia sorumutu ne’e mós atu ko’alia kona-ba dezenvolvimentu produsaun batar hanesan aihan ne’ebé barak, hateten Sekretáriu Estadu Agrikultura no Arborikultura, Marcos da Costa, iha sorutumutu kona-ba dezenvolvimentu produsaun batar, iha Salaun Otél Timór.

“Rekoñese katak dezenvolvimentu iha setór agrikultura liu-liu oinsá mak atu hasae batar ne’e kontribuisaun hosi ita hotu nian ne’ebé ita buka atu hasae kuantidade no kualidade produsaun. Iha buat rua importante la’ós de’it haree ba iha kuantidade no seguransa ne’e de’it maibé haree mós ba iha nutrisaun tanba ida ne’e mak iha deklarasaun komoro liubá, ita la’ós de’it ko’alia kona-ba seguransa alimentár no kuantidade de’it maibé mós haree ba iha produsaun nutrisiaun ba labarik ne’e buat ida ne’ebé importante  la’ós deit ba labarik maibé mós ba ema hotu-hotu,” dehan Sekretáriu Estadu.

Sekratáriu Estadu hatutan tan katak, “Hahan ida ne’ebé kualidade buat ida ne’ebé sai ita hotu nia preokupasaun, ita hotu nia hakarak atu fó aihan ida ne’ebé naton ka barak no mós ho kualidade di’ak.

Iha sorumutu ne’e  mós iha aprezentasaun kona-ba Developing Corn Varieties/lines for balancing rice consumption and demand in TL, hato’o hosi Claudino Nabais no Prof. Kim;
Intrudosusaun Rezultadu Peskiza Batar Mutin ho tipu PO7 no Potensia Batar iha Merkadu (Seed of Life/MAP) no Diskusaun Potensia Batar iha Merkadu.

komemorasaun ba loron daruak sei hala’o iha sesta-feira, loron 21 fulan Outubru 2011, iha Ministériu Agrikultura no Peska Comoro, Dili, ho aprezentasaun hosi Gil Rangel, Diretór Diresaun Nasionál Agrikultura no Hortikultura; kona-ba ekipa inter-Ministeriál seguransa aihan, no mós reafirmasaun kona-ba Kompromisu ba Deklarasaun Komoro Hosi Ministru Sira: Ministru Saúde, Ministru Turismu Komérsiu no Industria, Ministru Ekonomia no Dezenvolvimentu, Ministru Eduksaun, Ministra Solidariedade Sosiál, Ministra Finansa, Ministru Agrikultura no Peskas, aleinde ne’e mós iha kontinua ho atividade loke bazár.