Sekretáriu Estadu Formasaun Profisionál no Empregu (SEFOPE), Bendito Freitas, iha loron 5 Novembru tinan ne’e, inaugura estrada rurál no halo inspesaun ba servisu maundeobra iha sub-distritu Vemasse, distritu Baucau.

Serimónia inaugurasaun ba estrada rurál, halo ba estrada ne’ebé liga hosi estrada nasionál ba suku Kai-Kua antigu, sub-distritu Vemasse, distritu Baukau, ho distánsia kilómetru 6. Projetu ne’e hahú hosi Janeiru 2011 no termina iha Marsu 2011.

Iha loron hanesan, Sekretáriu Estadu, halo mós inspensaun ba servisu maundeobra ba rehabilitasaun estrada rurál ho distansia 3 Km, ne’ebé projetu ne’e hahú iha fulan Agostu 2011 no sei remata iha Novembru 2011. No projetu ne’e hala’o iha Suku Kai-Kua hodi liga ba Aldeia rua hanesan, Aldeia Bahamori no Aldeia Kai-Kua.

Sekretáriu Estadu, Bendito Freitas iha nia nia intervensaun hateten “rezultadu hosi servisu maundeobra ne’e hatudu duni katak realidade prosesu dezenvolvimentu rurál hala’o duni. Tanba ita hotu hatene infraestutura hanesan estrada mak sai hanesan preokupasaun povu rurál sira nian iha territóriu timór laran tomak”.

Sekretáriu Estadu, reforsa liután katak, objetivu prinsipál hosi programa servisu maundeobra ba estrada rurál ne’e mak, oinsá Governu atu fasilita povu rurál sira bele uza estrada rurál hodi fasilita sira-nia produtu lokál lori mai to’o iha merkadu nasionál, no mós bele fó asesu ba edukusaun, saúde no justisa ba komunidade iha área remota.

iha fatin hanesan Admistradór sub-distritu Vemasse, Tomás Fransisco da Costa Freitas ne’ebé lori povu Vemasse no liu-liu povu Kai-Kua hato’o agredese bo’ot ba SEFOPE. “Ami husu nafatin ba SEFOPE atu bele kontinua halo planu 2012 hodi haree estrada rurál hosi suku Kai-Kua ba suku Osowala”, trenik Francisco