Sorumutu Konsellu Ministru loron 26 fulan Outubru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
...............................................................................................................................................
KOMUNIKADU BA IMPRENSA
Sorumutu Konsellu Ministru iha loron 26 fulan Outubru 2011
Konsellu Ministru hala’o Sorumutu iha kuarta-feira ne’e, loron 26 fulan Outubru 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:
1. Rezolusaun Governu ne’ebé nomeia Prezidente Konsellu Administativu RTTL nian
Sekretaria Estadu Konsellu Ministru, hanesan responsável ba órgaun komunikasaun sosiál Estadu nian, aprezenta ba Konsellu Ministru proposta ne’ebé mak nomeia Prezidente Konsellu Administrativu Rádiu no Televisaun Timor-Leste.
Nune’e tanba haree ba rekoñesimentu kapasidade téknika no profisionál, liu-liu iha área komunikasaun sosiál no nesesidade atu hodi konsolida órgaun sosiál emprenza nian, mak Konsellu Ministru aprova nomeasaun Expedito Dias Ximenes hanesan Prezidente Konsellu Administrasaun ba Rádiu no Televisaun Timor-Leste, E.P..
2. Dekretu-Lei ne’ebé mak aprova Primeira Alterasaun ba Dekretu-Lei n°9/2010, loron 21 fulan Juñu, kona-ba Asisténsia Médika iha Estranjeiru
Dekretu-Lei n° 9/2010, ne’ebé regula Asisténsia Médika iha Estranjeiru, prevee katak pagamentu ba despeza asosiada sira, ne’e reponsabilidade Ministériu Saúde nian. Tanba despeza hirak ne’e hotu reprezenta, ba gastu ne’ebé iha ligasaun diretamente ba pagamentu kuidadu saúde nian, hanesan kustu ho alojamentu, alimentasaun no viajen, vistu no emisaun pasaporte nian, mak Governu entende katak pagamentu ba despeza hirak ne’e obedese la’os deit ba ezijénsia servisu públiku asisténsia médika nian, maibé mós ba asisténsia no apoiu sosiál.
Ho nune’e, Konsellu Ministru aprova alterasaun artigu 13°, ne’ebé bele permiti katak, liu husi pedidu ho fundamentu husi Ministériu Saúde nian, mak Ministériu Solidariedade Sosiál, ne’ebé mak iha disponibilidade finanseira, bele hamutuk halo finansiamentu ba ne’e.
3. Deliberasaun ne’ebé konsede Toleránsia Pontu
Tanba Loron Santu Hotu nian, mak loron 1 fulan Novembru, ne’ebé koresponde iha liturjia sarani nian ba festa selebrada ho honra ba santu no mártir sira, no Loron Matebian nian, loron 2 fulan Novembru, hanesan feriadu nasionál, mak Konsellu Ministru deside fó toleránsia pontu, atu nune’e funsionáriu sira bele fila husi distritu ba sira ida-idak nia servisu fatin.
Nune’e, fó toleránsia pontu iha loron 3 fulan Novembru 2011, kinta-feira, iha parte dadeer nian, ba funsionáriu no ajente hotu ne’ebé dependente ba ministériu ka servisu sira, nune’e mós ba institutu no organizasaun hirak ne’ebé integradu iha administrasaun indireta Estadu nian.
4. Delibera Aprovasaun kona-ba Votu Solidariedade no laran triste
Tanba foin daudaun rai nakdoko iha Turkia, no udan boot ne’ebé halo ema mate no estraga nasaun ne’e, hanesan mós iha Tailándia, Filipina, Itália, Vietname, Nicaragua, Guatemala no Kambodja, mak Konsellu Ministru iha aktu solidariedade no fraternidade (prinsípiu fundamentál ne’ebé hakerek iha Konstituisaun Timor-Leste nian) deside hodi aprova Votu Solidariedade no laran triste nian ba vítima no família hotu ne’ebé hetan dezastre natural hirak ne’e.
