Governu Timor-Leste, liu hosi Ministériu Negósiu Estranjeiru, iha kuarta-feira, loron 19 fulan Outubru, tinan 2011, halo inaugurasaun ba Konsuladu foun Repúblika Demokrátiku Timor-Leste nian iha Kupang, NTT, Indonézia

Papél Konsuladu Kupang importante tebes, tanba liga Nasaun amigavél rua entre Timor-Leste ho Indonézia liu hosi fronteira terrestre. Movimentasaun ema, troka komérsiu, festa sira kultura, desportiva no mós ánimu estudante Timor-Leste sira ne’ebé kontinua estuda iha Kupang, sai nu’udar fatór importante ne’ebé mak lori Governu Timor-Leste kria fundu ba apoiu atu bele harii rasik edifisiu Konsuladu iha provinsia ida ne’e, iha tinan ida ne’e”. Hateten Ministru Negósiu Estranjeiru, Zacarias Albano da Costa.

Zacarias Albano mós fó agradese ba Governadór Provinsia Nusa tenggara Timur (NTT), ho autoridade hotu ne’ebé sempre fó apoiu no hala’o koordenasaun di’ak hahú uluk kedas bainhira Timor-Leste estabelese Konsuladu iha Kupang no loron ida ohin iha rasik ona edifisiu ne’ebé inaugura ne’e.

Iha fatin hanesan, Vise Governadór NTT, Edson Fonai, ne’ebé reprezenta Governadór iha serimónia inaugurasaun Konsuladu Timor-Leste, fó agradese tebés ba Governu Timor-Leste ne’ebé harii Konsuladu iha NTT.

Edson hatutan tan katak “Prezensa Konsuladu iha ne’e hanesan dezenvolvimentu relasaun servisu di’ak ne’ebé hari’i tiha ona entre Governu Indonézia no Governu Timor-Leste no hein katak ho inaugurasaun ida ne’e bele alkansa servisu hamutuk entre nasaun rua hodi fó kontribuisaun atu atinji objetivu hosi dezenvolvimentu hamutuk, iha área Ekonomia, Edukasaun, Kulturál, Desportu no seluk tan.” Tenik Nia.

Delegasaun Timor-Leste nian ne’ebé marka prezensa iha serimónia inaugurasaun Konsuladu Timor-Leste nian mak hanesan, Ministériu Negósiu Estranjeiru, Zacarias Albano da Costa,  Diretór Jerál sira hosi Sekretaria Estadu Seguransa, Ministériu Finansa, Ministériu Infraestrutura no Ministériu Negósiu Estranjeiru rasik. Hosi parte Indonézia nian reprezenta hosi Governu Lokál Provinsia Nusa Tenggara Timur (NTT) no interministeriál sira hotu, Administradór Distritu, Administradór Kefa no membru Parlamentu Distritu Belu (Atambua).