Primeiru-Ministru ho nia komitiva hasoru malu ho Prezidente Repúblika Sudaun Sul, Salva Kiir Mayardit. Hasoru malu ba dahuluk husi lider rua ne’e, atu hametin relasaun bilaterál di’ak liután entre nasaun rua ne’e no mós hodi kompromete servisu hamutuk iha futuru, tanba iha istória hanesan kona-ba luta hodi hetan independénsia.

Sudaun Sul hakarak nia lider sira hatene oinsá mak Timor-Leste bele jere nia fundu minarai nian. Primeiru- Ministru Xanana Gusmão esplika katak, Timor-Leste utiliza sistema ne’ebé rikuso’e rai nian uza atu hodi halo dezenvolvimentu liu-liu ba infra-estrutura báziku no rai mós ba jerasaun tuir mai.

Timor-Leste oferese ba Estadu Sudaun atu haruka nia ema bele mai servisu hamutuk ho National Petrolium Authority hodi haree oinsá mak Timor-Leste jere nia rikusoi liu- liu iha área minarai.

Hafoin, Primeiru-Ministru, Ministra Finansa hamutuk ho Ministru Finansa Sudaun Sul no delegasaun hasoru malu ho doadór sira iha fatin World Bank iha Juba. Hasoru malu ida ne’e nia objetivu hodi Timor-Leste bele fahe nia esperiénsia servisu nian ho doadór sira iha Timor-Leste.

Iha diskursu Xanana Gusmão nian husu ba doadór sira atu iha planu ida ne’ebé hanesan ho Planu nasaun nian hodi bele dezenvolve nasaun ne’ebe foin mak harii.

Iha okaziaun ne’e mós Primeiru-Ministru ho nia komitiva hala’o sorumutu badak ho Prezidente Parlamentu Sudaun Sul nian, James Wani Igga. Iha sorumutu ne’e, Prezidente Parlamentu fó sai sira nia esperiénsia no difikuldade hirak ne’ebe seidauk hetan solusaun hafoin hetan tiha independénsia, mak hanesan refujiadu, fronteira no mós sira nia dezenvolvimentu ekonómiku no setór hirak seluk no husu Timor-Leste nia apoiu hanesan maun ne’ebé hetan ona independénsia uluk kompara ho Sudaun Sul.

Primeiru-Ministru aproveita oportunidade ne’e hodi entrega livru Planeamentu Estratégiku Dezenvolvimentu Timor-Leste nian.