Primeiru-Ministru Kay Rala Xanana Gusmão, no Ministra Finansas, Emília Pires, hala’o visita ofisial ba Juba kapitál Repúblika Sudaun Sul. Delegasaun to’o iha Juba Loron 16 Outubru 2011 no simu husi Ministru na’in hitu husi Governu Sudaun Sul nian.

Iha konferénsia imprensa ne’ebé fó sai iha aeroportu Juba nian, Primeiru-Ministru Timor-Leste akompaña husi Ministru Negosiu Estranjeiru no Ministru Finansa Repúblika Sudaun Sul nian, hateten katak “objetivu mai visita ne’e atu fo solidaridade Governu no Povu Timor-Leste nian ba nasaun foun ne’e. Sudaun Sul foin hetan independénsia iha loron 9, fulan Jullu 2011 liu husi referendu ne’ebé organiza husi Nasoens Unidas 99% povo Sudaun Sul hili independénsia”.

Vizita ne’e mós atu fahe esperiénsia no hametin relasaun diplomátika entre nasaun rua ne’e. Timor-Leste estabelese relasaun diplomátika iha loron 13, fulan Outubru 2011 liu husi akordu diplomátiku iha New York ne’ebé asina husi Timor-Leste ho Sudaun Sul nia Embasadór Permanente ba Nasoens Unidas.

Primeiru-Ministru no Ministra Finansa nia visita ne’e mós atu atende sorumutu ne’ebé halibur reprezentante sira husi Pais membru g7+ ne’ebé hahú iha loron 18 to’o 19, fulan Outubru 2011. Timor-Leste nu’edar Prezidente ba g7+ atende  Sorumutu ida ne’e atu halibur hanoin sira no prepara estratéjia atu hodi hato iha sorumutu iha Busan, Korea Sul entre Pais riku no doadór sira.