Sekretáriu Estadu Formasaun Profisionál no Empregu (SEFOPE), Bendito Freitas,  iha loron 7 fulan Outubru 2011, entrega sertifikadu ba graduadu sira hamutuk 42 ne’ebé remata sira nia kursu iha Sentru Treinamentu Vokasionál Juventude (STVJ), Gleno, Distritu Ermera.

“Setór privadu importante tebe-tebes atu servisu hamutuk ho ajente públiku sira hodi kombate dezempregu no rekoñese katak problema rekursu umanu mak sai hanesan dezafiu bo’ot ba prosesu dezenvolvimentu nasionál tanba ne’e, SEFOPE kontinua fiar no servisu hamutuk ho parseiru sira atu hasa’e kapasitasaun rekursu umanu liu-liu iha área tékniku profisionál, ho objetivu atu responde nesesidade indústria nian ho kualidade, dehan Sekretáriu Estadu, Bendito Freitas.

Sekretáriu Estadu  mós hato’o nia agredesimentu ba inan-aman sira ne’ebé fiar ona STVJ hodi akompaña sira-nia oan sira to’o remata kursu ida ne’e.

Diretora STVJ Deodora Pereira hateten katak, sentru treinamentu ida ne’e, ohin loron sente kontente no haksolok tanba ba dahuluk nu’udar sentru nasionál, ne’ebé inisia fasilita no forma tan partisipante sira hamutuk nain 42 ba kursu fundasaun.

“Graduandu sira 42 ne’e, nain 6 mak halo negósiu ki’ik ne’ebé hetan apoiu hosi Sentru ne’e rasik, nain 3 mak servisu ona iha restaurante no 10 sei kontinua sira-nia estájiu iha empreza sira, tanba nesesidade hosi empreza área agrikultura nian,” tenik nia.