Ministra Solidariedade Sosiál, Maria Domingas Fernandes Alves, iha loron 7 fulan Outobru 2011 iha Distritu Manufahi, hala’o lansamentu ba Organizasaun Grupu Lian Labarik no Asaun husi Distritu Manufahi no Ainaro ho objetivu ida katak labarik sira mós iha direitu atu proteje sira nia-an husi hahalok oin-oin ne’ebé sira hasoru.

Ministra informa katak, kona-ba  direitu labarik nian ne’e Estadu Timor-Leste rekoñese tiha ona  liu husi ratifikasaun konvensaun direitu labarik nian, liu mós husi estrutura ida ne’ebé kria hela  iha Ministériu Justisa, ita mós iha komisária nasionál ba direitu labarik nian, nune’e mós MSS iha Departamentu ida ne’ebé fó Protesaun ba labarik sira hodi kria mós OPL (Ofisiál Protesaun Labarik) iha distritu hotu-hotu.

Ministra, Maria Domingas Fernandes Alves sublina Organizasaun ka movimentu ida labele para de’it  iha nia simbólu, vizaun, no nia misaun, maibé tenke  hatudu ho nia prátika, katak  labarik sira ne’e tenke sai ema ida ne’ebé iha profisaun di’ak, bele sai ministra, bele sai doutór bele sai mós profesór sira tuir imi nia vizaun rasik.

Amandio da Cruz Sarmento ofisiál protesaun labarik iha organizasaun Save the Children hato’o katak, Grupu Lian Labarik no Asaun husi distritu Manufahi no Ainaro ne’e harii ho inisiativa labarik sira nian rasik, atu  oinsá  bele tau matan ba labarik sira iha área remota sira, ne’ebé la iha asesu ba informasaun, sempre hetan abuzu no  violénsia, tanba ne’e sira hamrik iha sira nia organizasaun rasik.  Ho situasaun ida ne’e mak sira rasik promete ba sira nia-an atu hamriik sai hanesan grupu ida duni  hodi bele proteje sira nia direitu, Tenik Nia.