Ministériu Justisa liu hosi Ministra Lúcia Lobato, iha fin fulan Setembru ne’e, simu vizita kortezia ida hosi Bastonáriu ba Ordem Advogadu sira nian hosi Portugal, António Marinho Pinto.

Ministra Justisa, Lúcia Lobato hateten, Bastonário ba Ordem Advogadu sira nian husi Portugal hala’o nia vizita ofisiál mai Timór-Leste ne’e, tanba nia simu duni konvite ne’ebé mak antes ne’e hau rasik mak entrega ba nia, ne’e hanesan pasu ida atu kria parseria entre Governu Timór-Leste ho Ordem Advogadu sira nian husi Portugál.

tanba tuir lei, oras ne’e daudaun ita nia Governu prepara hela grupu ba advogadu privadu sira ne’ebé atu remata ona sira nia formasaun profisionál hosi Sentru Formasaun Jurídika”.

Tuir Ministra, ordem Advogadu sira ne’e tenke hamosu hosi lei, tanba Rejime Juridiku Advokasia Privada no Formasaun ba Advogadu sira ne’ebé oras ne’e vigora hela, fó kompeténsia ba Governu liu hosi Ministériu Justisa, hodi hahú prepara harii órgaun advogadu independente Timór-Leste nian. Tanba ne’e ministériu tenke iha nia parseiru tékniku ida atu oinsá mak bele hala’o programa ne’e, esplika Lúcia Lobato.

Ministra hatutan tan katak, Portugál liu hosi Ordem Advogadu Portugál nian, sei fó de’it sira-nia apoiu tékniku, maibé fundu ba despeza sira, Governu Timor-Leste mak prepara rasik.

Oras ne’e daudaun iha advogadu Timor-Leste nian  hosi primeiru grupu, tuir hela formasaun iha Sentru Formasaun Jurídika, iha Díli, no sei termina sira nia formasaun ne’e iha tempu badak.