Timor-Leste, liu husi Sekretaria Estadu Juventude no Desportu, asina ona Akordu ida kona-ba Kooperasaun iha área desportu ho Institutu Nasionál Desportu, Edukasaun Físika no Rekreasaun Repúblika Cuba. Miguel Manetelo, Sekretáriu Estadu ne’ebé iha kompeténsia iha área ne’e, dezloka ba Cuba, iha Setembru liubá, atu asina Akordu ida ne’ebé atu hodi fortalese kooperasaun téknika no interkámbiu desportivu hodi hetan nível ida superiór iha dezenvolvimentu desportivu husi nasaun rua ne’e.

Iha Akordu ne’e prevee interkámbiu hosi atleta no ekipa sira hodi bele partisipa iha kompetisaun bilaterál no multilaterál sira, ne’ebé mak hala’o iha Timor-Leste ka iha Cuba, nune’e mós hosi funsionáriu, treinadór no espesialista sira área Edukasaun Físika, Desportu no Siénsia  ne’ebé mak aplika.

Sekretaria Estadu Juventude Desportu no Institutu Nasionál Desportu, Edukasaun Físika no Rekreasaun Repúblika Cuba asumi kompromisu atu kontribui foti a’as liután nível Desportu iha área hirak tuir mai ne’e: organizasaun ba programa, informátika ba desportu, instalasaun no ekipamentu ba desportivu, formasaun ba treinadór no espesialista sira, administrasaun no medisina desportiva, kombate mós doping no média iha eventu desportivu sira.