Sekretaria Estadu Promosaun Igualdade (SEPI), ho organizasaun feto iha partidu polítiku, servisu hamutuk ho sosiedade sivil, Asososiasaun Hak (yayasan Hak), Rede Feto, Fundasaun Alola no Caucus, hala’o sorumutu ba preparasaun Feto Partidu polítiku sira no organizasaun sosiedade sivil ba Eleisaun 2012, ho tema “Hamatuk ita bele no hetan forsa, ha’u bele, O bele, ita bele”, iha salaun Delta nova, Dili (22/09/2011).
“Sorumutu ida ohin ne’e importante, tanba hanesan kontinuasaun hosi Sorumutu ne’ebé SEPI hala’o tiha ona, iha nivél nasionál no mós involve nivél distritál sira, nivél Xefe Suku iha konsellu suku sira, no SEPI halibur fila-fali ídea no rekomendasaun sira ne’e hotu, atu mai hasa’e plataforma ida, plataforma ba feto iha vida polítika ba 2012”, hateten Sekretária Estadu Promosaun Igualdade, Idelta Maria Rodrigues.
Idelta hatutan tan katak, partidu sira mós agora aumenta, entaun partidu hotu ne’ebé foun ka tuan tenke iha koñesimentu ba asuntu igualdade jéneru nian iha sira ninia programa partidu nian, tanba ne’e mak plataforma ida ohin hasai no plataforma ne’e kondús hosi reprezentante partidu polítiku ruanulu-resin-rua. Ida ne’e importante atu sira bele haree, prioridade iha tinan uluk nian sei hanesan ho ida agora ka lae, tanba ne’e mak ohin ita halo atualizasaun fali no sira debate mós kona-ba asuntu saída mak sai prioridade hosi partidu polítiku sira hotu, atu nune’e partidu politiku sira bele lori ba sira ninia partidu laran, hodi sai hanesan plataforma ida ba feto sira iha polítika ba tinan 2012-2017”.
“Kestaun importante sira iha plataforma uluk iha tinan 2007 iha área hitu ka ualu mak hanesan ita haree ba feto iha justisa no seguransa, oinsa mak hakbiit feto iha ekonomia, Edukasaun, polítika, kultura, média no oinsa mak atu feto iha asesu ba saúde, liu-liu kona-ba justisa, oinsa mak sira bele haree ba futuru. Tanba ne’e mak iha buat barak mak la hanesan ona ho situasaun atuál. Ne’e duni mak asuntu hitu ne’e prioritáriu tebe-tebes atu sira bele haree fila-fali hodi redús ka aumenta ka mantein, ida ne’e mak sei debate”, tenik sekretária Estadu.
Partisipa iha sorumutu ne’e mak hanesan Vise Ministra Saúde, Madalena Hanjam, reprezentante feto hosi partidu polítiku no observadór sira hanesan CNE, JSMP, CPJTL, Assosiasaun HAK, Forum ONG, UNEST, UNMIT Democratic Governance Support Unit, UN WOMEN, IRI, TAF, UNMIT PIO.