Ministériu Turizmu, Komérsiu no Indústria, liu hosi Inspesaun Alimentar Ekonómika, Diresaun Nasionál Turizmu no Komérsiu Doméstika hamutuk ho Autoridade Lokál, PNTL no Emprezáriu sira iha Distritu Oe-kusse, hala’o sosializasaun ba dekretu-lei tolu kona-ba programa Ministériu nian ne’ebé aprova ona husi Konsellu Ministru no promulga hosi Prezidente Repúblika.
Dekretu Lei Tolu ne’e mak hanesan, Dekretu Lei No. 24/2011 kona-ba Rejime ba Lisensiamentu Atividade Komersiál, Dekretu-Lei No. 7/2009, kona-ba Regulamentu ba Restaurante no Estabelesimentu Similár sira no Dekretu-Lei No. 23/2009 kona-ba Rejime Infrasaun Administrativa Kontra Ekonomia no Seguransa Alimentar
Inspetora-Jerál, Inspeksaun Alimentar no Ekonómika IAE, Florentina Smith ko’alia iha abertura sosializasaun dekretu lei sira ne’e, esplika kona-ba programa, prosedimentu no knaar IAE nian, atu nune’e partisipante sira bele hatene no evita dúvida sira iha aspektu sira ne’e”.
Florentina Smith iha oportunidade ne’e kontinua enkoraja komersiante lokál sira atu bele intensifika sira nia atividade, maibé tenke tuir regulamentu sira ne’ebé estabelese hosi Governu, atu nune’e bele previne hetan sansaun ne’ebé bele aplika husi parte kompetente sira, hanesan MTCI, bainhira la hala’o tuir regra sira.
Kona-ba Lisensiamentu Atividade Komersiál, Domingos Guterres ne’ebé representa Diresaun Nasionál Komérsiu Doméstiku, MTKI, esplika katak, “Diploma ne’e nia objetivu mak atu estabelese regra sira atu hetan asesu ba atividade komersiál no kontribui ba ordenamentu no modernizasaun infra-estrutura komérsiu nian ne’ebé iha, nomós hanesan meiu atu proteje konkórensia ida ne’ebé livre entre komersiante sira no salvaguarda direitu konsumidór sira nian ne’ebé regula ona hosi Lei.
Ko’alia kona-ba Regulamentu ba Restaurante no Estabelesimentu Similár sira, Carmen Joela ne’ebé reprezenta Diresaun Nasionál do Turizmu, esplika katak, Dekretu-Lei ne’e estabelese hodi konsidera nesesidade atu bele regulariza estabelesimentu restaurante sira nian, atu bele haree kona-ba defeza konsumidór no kualidade alimentar nian.
Carmen Joela, hatutan tan katak, “Dekretu-Lei ne’e mós sei fó atensaun ba aspetu hijiene, meiu-ambiente, aumenta kredibilidade hosi potensiál turístiku, bazeia ba regra dixiplinár atividade nian.
Nune’e mós Rejime kona-ba Infrasaun Administrativa Kontra Ekonomia no Seguransa Alimentar, Asesór Tékniku IAE, Abílio Serreno esplika katak, Dekretu-Lei No. 23/2009 elabora ho intensaun atu halo prevensaun ba infrasaun ekonómika, liu-liu infrasaun ida ne’ebé tau perigu ba seguransa, saúde no hijiene alimentar no komplikasaun oioin.