Ministériu Edukasaun hamutuk ho Ministériu Saúde, Justisa, Ministériu Solidariedade Sosiál no Ajénsia Internasionál UNICEF, organiza Konferénsia Nasionál kona-ba Dezenvolvimentu Infantil durante loron rua hahú hosi loron 15 to’o 16 fulan Setembru, iha Salaun Nobre Ministériu Negósiu Estranjeiru,Díli.
Objetivu hosi konferénsia ne’e mak, atu troka informasaun no esperiénsia hosi ministériu relevante ho parseiru dezenvolvimentu sira atu promove Direitu Labarik nian iha Timor Leste, haree fila fali estatutu labarik nian no buka hanoin foun no biban ba servisu hamutuk ho parseiru sira iha área Dezenvolvimentu labarik nian.
Ministru Edukasaun, João Câncio Freitas, iha nia diskursu hodi loke konferénsia ba loron dahuluk nian ne’e hateten, “Governu liu hosi Ministériu Edukasaun rekoñese no sei promove direitu labarik sira nian iha Timor-Leste no sei Dezenvolve labarik sira ne’e iha área Saúde, Edukasaun, no moris iha ambiénte ida ne’ebé mak moos.
Ministru ne’e subliña tan, “Governu mós iha ona planu espesífiku ida atu dezenvolve área edukasaun nian, tanba ne’e mak Governu liu hosi ministériu edukasaun kria ona lei ensinu báziku eskolaridade nian hodi bele dezenvolve di’ak liután nivél edukasaun ba Labarik sira iha Timor Leste.
Iha fatin hanesan Vise Sekretáriu Jerál Nasõens Unidas nian iha Timor-Leste Finn Reske-Nielsen, hatuir katak, “Dezenvolvimentu Infantil nian, haree liu ba direitu labarik nian atu hetan dezenvolvimentu fizíku, lian, emosionál, kognitivu no sosiál naton hahú hosi momentu moris to’o labarik ne’e tama ba eskola primária”.
Nia hatutan tan katak, “liu hosi fó suporte ba direitu sira labarik nian iha momentu krítiku hanesan infantil, ita fó tulun ona atu previne difikuldade pesoál, sosiál no edukasionál durante iha tempu infansia nia laran to’o tempu foin sa’e nian. Atu kuidadu no dezenvolve labarik sira ne’e, ita presiza responde ba asuntu sira hanesan saúde, nutrisaun, edukasaun, saneamentu, protesaun no rahun di’ak labarik sira nian. Tenik nia.
Marka Prezensa iha Konferénsia ne’e Ministru Edukasaun João Cancio Freitas,Vise Sekretáriu Jerál Nasõens Unidas iha Timor Leste, Finn Reske-Nielsen,Embaixadóra Bõa vontade Edukasaun nian,nu’udar mós Diretóra Fundasaun Alola,Kristy Sword Gusmão, UNICEF no organizaun Child Fund.