Sorumutu Estraordináriu Konsellu Ministru loron 16 fulan Setembru tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
...............................................................................................................................................
KOMUNIKADU BA IMPRENSA
Sorumutu Estraordináriu Konsellu Ministru nian, iha Loron 16 fulan Setembru tinan 2011
Konsellu Ministru hala’o sorumutu Estraordináriu iha Sesta-feira ne’e iha loron 16 fulan Setembru tinan 2011, iha Sala Sorumutu Konsellu Ministru nian iha Palásiu Governu Díli no aprova ona:
1. Proposta-Lei Ne’ebé mak aprova Orsamentu Jerál Estadu, Repúblika Demokrátika Timor Leste nian ba tinan 2012
Proposta-Lei Orsamentu Jerál Estadu ba tinan 2012 tama mós reseita no despeza sira Estadu Timor-Leste nian no kobre períodu entre loron 1 fulan Janeiru tinan 2012 no loron 31 fulan Dezembru tinan 2012. Totál ne’ebé kalkula ba reseita fonte sira hotu (fonte Petrolífera, la’ós petrolífera, verba parseiru Dezenvolvimentu sira nian no reseita sira la’ós fiskál) ba OJE nian ba periódu ne’e, mak millaun $2.259,4 dólar norte-amerikanu nian. Dotasaun orsamentál, iha dólar norte-amerikanu, mak hanesan tuir mai ne’e:
1 - Millaun $140,1 ba Saláriu no Vensimentu;
2 - Millaun $344,7 ba bein no servisu, ne’ebé millaun $30 dólar norte-amerikanu tau ba ba Fundu dezenvolvimentu Kapitál Umanu nian;
3 - Millaun $194,2 ba transferénsia Públika;
4 - Millaun $30 ba Kaptál Menór;
5 - Millaun $1.054,4 ba Kapitál Dezenvolvimentu, ne’ebé millaun $745,2 dólar norte-amerikanu tau ba Fundu Infra-Estrutura sira nian.
Totál dotasaun ba orsamentu mak millaun $1.763,4 dólar norte-amerikanu.
IV Governu Konstitusionál, tuir polítka sira ne’ebé defini tiha ona, kontinua haka’as-an hodi dezenvolve asaun sira atu bele transforma ekonomia bazea ba iha petroleum ba fali ekonomia ida la’ós petrolífera no atrai investimentu, esensiál ba dezenvolvimentu no kresimentu Timor-Leste nian.
Ba ida ne’e hanesan kondisaun sine que non dezenvolvimentu ba área sira hanesan infra-estrutura no kapitál umanu. Iha tinan 2011, IV Governu ne’e lansa ona Planu Estratéjiku ba Dezenvolvimentu, no kria ona Fundu Infra-Estrutura no Fundu Dezenvolvimentu Kapitál Umanu nian.
Planu Estratéjiku Dezenvolvimentu mak Planu Povu nian ida ba Povu ne’ebé abranje área importante tolu ba Dezenvolvimentu nasaun nian: Kapitál sosiál, infra-estrutura no dezenvolvimentu ekonómiku.
Fundu ba Infra-estrutura sei ajuda Governu atu bele rezolve difikuldade hirak ne’ebé mosu iha konstrusaun ba Infra-Estrutura Timor-Leste nian.
Fundu Dezenvolvimentu Kapitál Umanu nian atu asegura forma ida ba finansiamentu projetu formasaun oioin ba rekursu umanu nian, hodi aumenta kapasidade no formasaun ba profisionál sira setór estratéjiku nian ba Dezenvovimentu.
