Sekretáriu Estadu Formasaun Profesionál no Empregu (SEFOPE), Bendito Freitas, iha loron 6 fulan Setembru tinan ne’e, iha edifisiu SEFOPE Kaikoli, Dili, asina nota entendementu ho Banku Dezenvolvimentu Aziátiku (BDA), ho ninia Responsavél, Sunhwa Lee, nu’udar Prinsipál Espesialista iha Dezenvolvimentu Sosiál.

Totál orsamentu hosi akordu ne’e hamutuk dolár 8,500,000 ne’ebé ADB prontu atu apoiu milliaun 7.5 (88.2%) no Governu Timor-Leste sei investe miliaun 1 (11.8%) ho durasaun durante tinan haat no tuir planu implementasaun programa ne’e sei hahú tinan 2012 to’o 2016.

“Objetivu kle’an hosi nota entendimentu ne’e, atu prepara no hasa’e kapasidade no hadi’a abilidade juventude sira nian liu hosi sistema treinamentu TVET (Technical and Vocational Education and Training) ne’ebé tuir padraun internasionál,” hateten, Sekretáriu Estadu, Bendito Freitas.

Sekretáriu Estadu mós reforsa liutan katak, sistema treinamentu ne’ebé maka parseiru dezenvolvimentu sira prepara atu hasa’e kapasidade juventude sira hosi nivél 2 to’o nivél 4 ba área Automotiv, Konstrusaun Sivíl, Ospitalidade no Turizmu.

Aleinde ne’e atu atinji objetivu hasa’e rekursu umanu ba área téknika profisionál, SEFOPE ho BDA mós involve parseiru dezenvolvimentu kapasitasaun atu fó treinamentu ba juventunde sira maka hanesan, Sentru Dom-Bosco, Sentru Nasionál Formasaun Profisionál Tibar, SENAI no DIT Baukau.

Bendito Freitas, fiar katak sistema treinamentu ne’ebé Sentru sira implementa iha duni kualidade tuir padraun Nasionál no Kualifikasaun ne’ebé INDMO (Instituisaun Nasionál Dezenvolvimentu Maun de Obra) estabelese.