Governu Timor-Leste

Estudante na’in neen simu  bolsa estudu iha área Turizmu  nian no asina ona, iha loron 9 fulan Setembru,  akordu ida hosi Diretór Nasionál Turizmu, José Quintas, iha prezensa Ministru Turizmu  Komérsiu no Indústria nian, Gil Alves. Bolsa estudu ida ne’e atu halo sira frekuenta kursu kona-ba área Turizamu nian, iha Eskola Superiór Otelaria no Turizmu  iha Estoril , Portugal.

Programa bolsa nian ne’e mai hosi Memorandu Entendimentu ida entre Ministériu Tuirzmu, Komérsiu no Indústria no Eskola Superior Otelaria no Turizmu Estoril nian iha tinan 2010.

Hosi parte rua konkorda kona-ba apoiu finanseiru. Ministériu Turizmu, Komérisiu no Indústria mak responsabiliza kona-ba viájen, seguru viájen, vistu (Portugal no Indonézia), taxa aeroportu nian, osan fulan-fulan. Eskola Superiór Otelaria no Turizmu Estoril nian ne’e mak responsável ba instalasaun, taxa eskolár no subsídiu alimentasaun nian.

Kandidatu sira hamutuk 105 ba bolsa estudu ne’e maibé hafoin halo tiha selesaun ba dokumentu kandidatu na’in 23 de’it mak liu. Halo teste entrevista no teste kona-ba koñesimentu Turizmu nian  no hosi teste hirak ne’e hetan de’it kandidatu na’in neen mak bele simu bolsa estudu ba Eskola Superiór Otelaria no Turizmu Estoril nian. Programa hirak ne’e mak relasiona ho área Entretenimentu Natureza nian,  bazeia ba Turizmu no Aventura, Turizmu Náutiku no Jestaun Animasaun Turístiku nian.