Ministériu Solidariedade Sosiál, liu hosi Sekretaria Estadu Asisténsia Sosiál no Dezastre Naturais, iha loron 9 fulan Setembru, fo apoiu materiál konstrusaun ba  komunidade sira iha suku Tasilin, Sub-distritu Zumalai, Distritu Covalima atu hari’i fila fali sira nia uma ne’ebé kauza hosi konflitus arte marsiál nian foin lalais ne’e.

Molok atu entrega materiál konstrusaun sira ne’e, MSS fasilita uluk diálogu entre komunidade sira iha sub-distritu Zumalai, liu-liu iha suku Tasilin, Aldeia Gallitas no Boroikun hamutuk ho grupu artemarsiál sira, KORKA ho PSHT. Iha diálogu ne’e grupu rua hato’o sira nia kompromisiu iha autoridade komunitária no membru governu sira nia oin katak, se la halo tan problema iha Suku laran nomos iha fatin seluk.

Sekretáriu Estadu Asisténsia Sosiál no Dezastre Naturais, Jacinto Rigoberto Gomes de Deus, husu ba komunidade sira iha Suku Taisilin Sub-distritu Zumalai, liliu ba grupu artemarsiál sira, liu hosi kompromisiu ne’ebé mai hosi diálogu ohin, ba oin bele servisu hamutuk hodi konstrui filafali  imi nia uma sira ne’ebé mak estragus, atu nune’e  bele moris hakmatek, iha paz no armonia nia laran no hametin liutan lasu amizade entre imi”.

Iha oprtunidade ne’e Sekretáriu Estadu mós fó apoiu materiál kontruksaun ba família 67 iha Zumalai, ne’ebé kauza hosi konflitu entre arte marsiál sira foin lalais ne’e. Jacinto informa liutan katak materiál konstrusaun sira ne’ebé entrega bá família vitima sira ne’e mak hanesan, Kalen tahan 50,  Besi lolon 22,  Semente  saka 25, Pregu hamutuk kilograma sanulu, arame rolu 2, osan ba maun de obra hamutuk dólar amerikanu 150 no osan ba Ai kuadradu hamutuk dólar amerikanu, 218, ba família ida-idak, atu nune’e bele hari’i fila fali sira nia uma ne’ebé hetan sunu no estragus. Hateten Jacinto

Xefe Suku Taisilin Agostinho Pereira hato’o katak, maske apoiu ne’e la sufsiente maibé bele ona ajuda família sira hodi harii fila fali sira nia uma iha tempu badak.