IV GOVERNU KONSTITUSIONÁL

SEKRETARIA ESTADU KONSELLU MINISTRU

……………………………………………………………………………………………………………………………..

KOMUNIKADU BA IMPRENSA

Sorumutu Konsellu Ministru iha loron 7 fulan Setembru 2011

 

Konsellu Ministru hala’o Sorumutu iha kuarta-feira ne’e, loron 7 fulan Setembru 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:

1. Dekretu Lei ne’ebé aprova Planu Kurrikulár Ensinu Sekundáriu Jerál nian no nia respetivu Rejime Implementasaun

Ministériu Edukasaun hetan ona aprovasaun ba Dekretu-Lei ne’ebé konsagra Kurríkulu Nasionál Ensinu Sekundáriu Jerál nian no iha tempu hanesan determina mós ninia regra implementasaun.

Liu husi aprovasaun Diploma ida ne’e, Governu Konstitusionál ba Dahaat, atinje meta importante atu hetan Kurríkulu Nasionál ba ensinu báziku no sekundáriu hotu-hotu, hodi promove dezenvolvimentu ba sistema ensinu ida ne’ebé kualidade, nune’e mós konsolidasaun ba identidade nasionál.

2. Rezolusaun Governu nian kona-ba Protesaun Patrimóniu Kulturál

Konsellu Ministru aprova ona Rezolusaun Governu ne’ebé konfere protesaun legál ba patrimóniu kulturál. Rezolusaun ne’e, define mekanizmu lubun ida ne’ebé rekoñese katak Sekretaria Estadu Kultura no servisu sira iha nia diresaun Ministériu Edukasaun nian, ne’ebé mak iha ninia tutela ba jestaun hodi asegura enkuadramentu legál indispensável ba inventarizasaun, jestaun, protesaun no valorizasaun patrimóniu kulturál nasaun nian.

Konsellu Ministru analiza mós:

1. Espozisaun Embaixadora Izraél nian iha Singapura

Embaixadora Izraél nian iha Singapura, Amira Arnon, iha nia espozisaun badak ida ba Konsellu Ministru, ko’alia kona-ba etapa hirak ne’ebé nia luta hodi hetan independénsia, iha sentidu atu rekoñese Izraél no Palestina hanesan Estadu rua ne’ebé mak independente. Amira Arnon aproveita mós oinsá halo komparasaun entre luta Izraél no Timor-Leste nian ba kauza hanesan, independénsia.

2. Dekretu-Lei ne’ebé aprova Rejime Formasaun no Dezenvolvimentu Rekursu Umanu Funsaun Públika nian

Konsellu Ministru haree fila fali kona-ba direitu, responsabilidade, atividade no posível formasaun funsionáriu públiku sira nian hodi reforsa importánsia servisu hamutuk no koordenada ho instituisaun sira ne’ebé mak responsável. Komisaun Funsaun Públika sei iha biban atu diskute fali Dekretu-Lei ne’e iha Sorumutu Konsellu Ministru nian oin mai.