Sorumutu Konsellu Ministru loron 17 fulan Agostu tinan 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
............................................................................................................................................
KOMUNIKADU BA IMPRENSA
Sorumutu Konsellu Ministru nian loron 17, fulan Agostu 2011
Konsellu Ministru hala’o Sorumutu, iha kuarta-feira ida ne’e, loron 17, fulan Agostu 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:
1. Dekretu-Lei ne’ebé mak aprova Alterasaun ba-dala lima ba Rejime Jurídiku Aprovizionamentu nian
Dekretu Lei ne’ebé mak ohin hetan aprovasaun permite atu projetu infra-estrutura estratéjika, ho valór kiik liu dolar millaun 1, ne’ebé bele hetan finansiamentu husi Fundu Infra-estrutura maibé uluk, projetu infra-estrutura sira ne’e ho valór mínimu dolar millaun1 mak bele selu liu husi Fundu ne’e.
2. Dekretu-Lei ne’ebé mak Altera Rejime Salariál PNTL nian
Konsellu Ministru aprova ona Alterasaun ba Dekretu Lei ne’ebé mak kria Suplemenetu ba Xefia no Diresaun ne’ebé bele aplika ba ofisiál sira ne’ebé hala’o funsaun iha nível Komando Jerál, atu ofisiál sira seluk husi unidade sira seluk, ne’ebé hala’o funsaun hanesan, bele mós hetan dereitu hanesan.
3. Dekretu Lei kona-ba Uza Forsa
Polísia, forsa sira no servisu seguransa públilu mak organízmu prinsipál ba protesaun ba liberdade no direitu ema nian no sira ne’ebé de’it mak bele hetan rekursu ba forsa hasoru forsa seluk ne’ebé la tuir lei ka ilejítima. Tan ne’e, presiza mekanízmu jurídiku sira ne’ebé iha situasaun esepsaun nian, bele rekoñese podér rekursu nian ba forsa. Iha aspetu ida ne’e, iha nesesidade klarifikasaun normativa ba kazu no kondisaun sira ne’ebé mak atu utiliza meiu hirak ne’e atu nune’e labele halo arbiru de’it hodi la tuir objetivu seguransa públika nian.
Konsellu Ministru aprova ona Dekretu Lei ne’ebé mak hakarak fó resposta ba nesesidade ne’e no halo lejizlasaun tuir prinsípiu jurídiku sira direitu internasionál no internu nian, hodi estabelese limite sira ne’ebé mak konsidera katak iha violasaun la tuir lei ba direitu no liberdade fundamentál sidadaun sira nian.
4. Rezolusaun Governu nian ne’ebé aprova Asaun Nasionál Adaptasaun ba Alterasaun Klimátika
Aprova ona Programa Asaun Nasionál Adaptasaun nian ba Alterasaun Klimátika (PANA) ne’ebé halo tuir programa IV Governu Konstitusionál nian, ne’ebé entende área ambientál hanesan esensiál no indispensável iha estratéjia dezenvolvimentu sustentável país nian no promosaun kualidade moris sidadaun timoroan sira nian.
PANA hakarak halo país ne’e rezistente liu ba alterasaun klimátika liu husi medida tranzversál sentrada iha redusaun ba efeitu sira ne’ebé kontráriu ho hirak ne’e no promosaun dezenvolvimentu no uzu sustentável rekursu naturál sira nian.
5. Dekretu-Lei ne’ebé halo Alterasaun Dahaat ba Dekretu-Lei Númeru 15/2008 loron 4 Juñu ne’ebé Regulamenta Pensaun sira ba Kombatente no Martir Sira Libertasaun Nasionál Nian
Alterasaun ne’ebé hetan aprovasaun iha Konsellu Ministru permite atu regulamenta pagamentu retroativu kona-ba pensaun sira ba Kombatente no Martir Sira Libertasaun Nasionál nian, hanesan diskute ona iha Parlamentu Nasionál kuandu hala’o diskusaun ba Orsamentu Jerál Estadu nian no rezulta aumentu Orsamentu ba Fundu Transferénsia Nian.
Dekretu-Lei ne’e altera mós direitu ba Pensaun Sobrevivénsia nian ne’ebé prevee tiha ona iha Lei Númeru 3/2006 loron 12 fulan Abril, ne’ebé asegura sustentu ba oan ki’ikoan sira, bainhira titulár preferénsiál husi pensaun nian mate karik, ne’e katak, bainhira feen ka lain kaben husi mártir ne’e mate.
Konsellu Ministru analiza mós:
1. Espozisaun Embaixadór Palestina nian ba Nova Zelándia, Timor-Leste, Papua Nova Guiné no Vanuatu
Izzat Adulhadi, Embaixadór Palestina nian ba Nova Zelándia, Timor-Leste, Papua Nova Guiné no Vanuatu, hola parte mós iha Sorumutu Konsellu Ministru nian ne’ebé nia halo esplikasaun badak ida kona-ba negosiasaun sira ne’ebé Palestina no Israel hala’o tiha ona hodi hetan Pás, prosesu ida, ne’ebé, tuir Embaixadór Abdulhadi katak, naksobu tiha fali ona tanba laiha envolvimentu diretu husi komunidade internasionál, tan ne’e Konsellu Ministru apresia intervensaun ne’e no sei halo análize loloos nian hodi fó apoiu ba Palestina.
2. IT Security
Ministériu Finansa lori ba Reuniaun Konsellu Ministru, kestaun seguransa Network Governu Nian. Iha reuniaun ne’e ko’alia kona-ba seguransa ekipamentu sira no dadus ne’ebé ida-idak iha, hodi alerta ba virus hirak ne’ebé bele mosu no forma oioin ne’ebé bele tama ba iha sistema.
3. Proposta Lei kona-ba Kódigu Labarik nian
Proposta Lei kona-ba Kódigu Labarik nian ne’ebé Ministériu Justisa aprezenta ohin iha Sorumutu Konsellu Ministru nian bazea ba norma no prinsípiu sira Konvensaun Nasoens Unidas Nian kona-ba Direitu Labarik sira nian no iha Protokolu Fakultativu rua ne’ebé relasiona ho Partisipasaun Labarik sira nian iha Konflitu Armadu no Fa’an Labarik, Prostituisaun Infantíl no Pornografia Infantíl ne’ebé Timor-Leste ratifika ona iha tinan 2003.
Membru sira Konsellu Ministru nian debate Proposta Lei ne’e atu estabelese no regulamenta direitu no liberdade fundamentál labarik nian tuir juridisaun Timor-Leste nian no atu nune’e bele estabelese sistema nasionál ida ba protesaun, hodi kontribui ba fortalesimentu ba ambiente ida favorável, tuba rai metin,seguru no protetór labarik nian.
4. Proposta Lei Autorizasaun Lejizlativa Kona-ba Rejime Penál Espesiál ba joven sira
Ministériu Justisa fó koñese ba Konsellu Ministru Proposta Rejime Penál Espesiál ida ba joven sira ne’ebé mak bele halo lais iha prosesu lejizlativu, hodi garante nafatin katak iha respeitu ba direitu sira, liberdade no garantia fundamentál sidadaun nian iha ámbitu Penál.
5. Projetu Investimentu ba Kompleksu Esplorasaun Mineira/Produsaun Simentu no Portu Privadu nian
Ministériu Ekonomía no Dezenvolvimentu hato’o iha Sorumutu Konsellu Ministru Projetu Investimentu ba Kompleksu Esplorasaun Mineira/Produsaun simentu no Portu Privadu iha Manatuto.Iha aprezentasaun projetu ne’e , sira deskute kona-ba lojístika investimentu no projetu nian no mós maior vantajen sira hosi projetu ne’e no impaktu ba ambiente.
