Ministru Ekonomia no Dezenvolvimentu, João Mendes Gonçalves asina Memoradu Entendimentu ida iha loron 11 fulan Agustu, ho Embaixadór Portugal nian, Luís Manuel Barreira de Sousa, hodi reprezenta Ministériu Agrikultura, Tasi, Ambiente no Ordenamentu Territóriu Portugal nian, iha ámbitu formasaun no kapasitasaun ba kuadru tékniku sira iha área meiu ambiente nian.

Hahú husi tinan 2007 mak Governu Portugés liu husi koordenasaun ho PNUA – Programa das Nações Unidas ba Ambiente buka dezenvolve programa, projetu no atividade sira kona-ba kapasitasaun iha área meiu ambiente nian iha Timor-Leste.

Nune’e, Memorandu Entendimentu ida ne’e sei formaliza abertura ba Kursu Espesializasaun ida kona-ba Polítika Ambiente nian, ne’ebé sei hala’o hosi Instituto Nacional de Administração de Portugal (INAP), ba funsionáriu sira hosi Diresaun Nasionál ba Asuntu Ambientál Internasinál Ministériu Ekonomia no Dezenvolvimentu nian.

Kursu ne’e sei halo ho módulu tolu iha oras 90 nia laran no abranje matéria sira kona-ba ambiente no sustentabilidade, konvensaun internasionál sira, avaliasaun ambientál estratéjika, merkadu ambientál sira, no sira seluk tan.

Projetu ne’e konta ho apoiu hosi Banku Mundiál ne’ebé aleinde fó apoiu lojístiku, hanesan halo instalasaun ba ekipamentu audiovizuál sira, suporta mós enkargu sira kona-ba tradusaun.