Governu Timor-Leste liu hosi Sekretaria Estadu Juventude no Desportu (SEJD), komemora loron Internasionál Foin sa’e nian iha loron 12 fulan Agostu, ho atividade oin-oin iha abertura iha loron 6 fulan Agostu  no sei taka iha loron 12 fulan agostu 2011 iha Dili.

Iha biban ne’e Diretór Jerál Sekretaria Estadu Juventude no Desportu, Jose Luis Padua de Oliveira hateten, objetivu husi komemorasaun ba loron Internasionál Foin sa’e nian atu bele hakbiit foinsa’e feto no mane  sira sai lider ne’ebé  responsável, saudável no síviku.

Enkuantu tema jerál ba komemorasaun 12 de Agostu 2011, mak “Hau Prontu Kontribui ba Dezenvolvimentu Sustentável”,tanba juventude mak futuru ba nasaun.

Eventu Futeból Salaun, partisipa husi klube sanulu resin neen iha Dili laran, ne’ebé mai hosi bairro hanesan, FC Comade Delta II, FC Leão Balide, FC Haburas Surik Mas, FC Neptune Comoro, FC Manumata Bidau, FC RGM Raikotu, FC One Box Brother Taibesi, FC Virtu Vila-Verde, FC União Bela-Vista Palacio Lahane, FC Jocar’s Perumas, FC Rumbia Caicoli, FC Jobla Unidos Lahane, FC Rusa Fuik, FC Ribeira Maloa no FC Fitun Kuluhun.

Prémiu ba Futeból Salaun mak hanesan, primeiru lugar hetan osan ho total U$1000, segundu lugar U$750, terseiru lugar U$500 no kuatru lugar U$250.

Aleinde ne’e, Sekretaria Estadu Juventude no Desportu mós organiza atividade seluk hanesan, workshop loron tolu ba konsellu eskola Sekundária iha Dili ne’ebé hala’o iha loron 10-12 Agostu 2011, Fun- Walk (jalan santai) hala’o  iha loron  12 Agostu 2011, Konsertu Múzika no Fó raan sei hala’o  iha loron 12 de Agostu 2011, lokraik.

Matéria ba workshop mak hanesan Dezenvolvimentu Foin sa’e ohin no Futuru, Alterasaun Klimátika, Lidera ho Espíritu Nasionalismu, Polítika Nasionál Juventude, Parlamentu Foin sa’e, konsellu Nasionál Juventude no Prinsípiu Prátika Arte Marsiál.