Governu Timor-Leste liu hosi Sekretaria Estadu Defeza hala’o Sorumutu Bilaterál ho Governu Austrália,iha loron 4 fulan Agostu 2011 iha sala Konferénsia Sekretaria Estadu Defeza, atu hametin kooperasaun ho Governu Austrália iha área Infraestrutura no kapasitasaun nian.

Diretór Jerál Sekretaria Estadu Defeza, João Corte-Real hateten, “Austrália hanesan ita nia parseiru ida ne’ebé durante ne’e fó apoiu barak ona mai Timor Leste, liuliu ba ita nia  Falintil-Forsa Defeza Timor-Leste. Liu hosi Rezultadu Kooperasaun ne’ebé ita nia Governu hala’o ho Austrália iha área kapasitasaun no Parte Infraestrutura nian, Governu Austrália fó apoiu  hodi hadia  Paiól Forsa Defeza Timor Leste nian,harii armazén iha Baucau.

Diretór ne’e mós Informa liután, kooperasaun ne’e ita hala’o tinan-tinan, aleinde halo kooperasaun iha área sira refere, Governu  Austrália fó  ona sira nia apoiu liu hosi formasaun iha área  formasaun  ba lian inglés no iha nivel formasaun oinoin iha rai liur, iha Sekretaria Estadu Defeza no iha F-FDTL rasik. Durante ne’e Forsa Defeza Timor Leste hamutuk ema nain 100 ida ona mak halo sira nia Estudu iha Austrália. No Austrália iha kompromisu atu kontinua fó apoiu nafatin ba forsa defeza Timor-Leste iha tinan 2012, tuir delegadu Ministériu Defeza Austrália nian.

Partisipa iha sorumutu ne’e mak, Maijór Jenerál F-FDTL, Taur Matan Ruak, Brigadeiru Jeneral F-FDTL, Lere Anan Timor, Koronél, Falur Rate Laek, Koronél, Mau-nana, Koronél Coliati, Maijór Rizai,Letnan Koronél Triz, Kapitaun Donasiano Gomes, Diretór Jerál Sekretaria Estadu Defeza, João Corte-Real. Hosi delegasaun Austrália nian mak, Embaixadór Austrália iha Timor Leste, Miles Armitage, Delegasaun Ministériu  Defeza Austrália Tyson Sara no Elisabeth White, Krlonél Adrew Duff hosi Autralia,Kapitaun Kenneth no Letnan Koronél, Paul Wright.