Iha loron 2 fulan Agostu, iha Dili, Sekretáriu Estadu Pekuária nian, Valentino Varela, hamutuk ho Prezidente Repúblika, José Ramos-Horta, no Embaixadór Austrália nian ba Timor-Leste, Miles Armitage, inaugura Laboratóriu Nasionál Saúde Animál nian.

Laboratóriu ida ne’e hanesan rezultadu husi kooperasaun entre Ministériu Agrikultura no Peska (MAP), Oraganizasaun Nasoens Unidas  nian  ba Agrikultura no Hahán (FAO – Food and Agriculture Organization) no Ajénsia Austrália nian ba Dezenvolvimentu (AusAID).

Diresaun Nasionál Pekuária no Veterinária nian husi MAP ne’e, harii laboratóriu ida ne’e ho objetivu atu halo diagnoze ba moras animál nian sira ne’ebé bele da’et ba ema nomós ho  hanoin atu sai hanesan entidade ne’ebé fó sai sertifikadu sanitáriu nian, produtu to’os no animál nian, ne’ebé importante ba importasaun no esportasaun.

Prezidente Repúblika, José Ramos Horta, iha ninia diskursu agradese parseiru dezenvolvimentu nian sira AusAID no FAO, ne’ebé hala’o servisu liu husi parseria ho Governu Timor-Leste, ne’ebé Ministériu Agrikultura no Peska mak reprezenta, ba esforsu atu hadi’a ita nia moris-di’ak, ne’ebé ko’alia kona-ba kontrolu ba fronteira, hodi evita kontaminasaun moras animál nian iha ita nia rain.”

Iha okazaiun ne’e mós, Sekretáriu Estadu Pekuária nian, Valentino Varela, salienta: “estabelesimentu laboratóriu ida ne’e lori vantajen ba Ministériu Agrikultura no Peska, liuliu ba Diresaun Nasionál Pekuária no Veterinária nian, tanba sei sai hanesan sentru ba formasaun no peskiza ba tékniku no médiku veterinária nian sira, atu bele halo análize ba amostra hirak ne’ebé sira hetan iha terrenu, nomós ba estudante UNTL nian sira ne’ebé halo hela kursu veterinária nian”.

Laboratóriu ida ne’e harii ho folin millaun 1,3 dolar amérika nian ho tulun osan husi Projetu Bioseguransa nian husi FAO no AusAID.