Sorumutu Konsellu Ministru nian loron 3, fulan Agostu 2011
IV GOVERNU KONSTITUSIONÁL
SEKRETARIA ESTADU KONSELLU MINISTRU
...............................................................................................................................................
KOMUNIKADU BA IMPRENSA
Sorumutu Konsellu Ministru nian loron 3, fulan Agostu 2011
Konsellu Ministru hala’o Sorumutu, iha kuarta-feira ida ne’e, loron 3, fulan Agostu 2011, iha Sala Sorumutu Konsellu Ministru nian, iha Palásiu Governu, iha Díli, no aprova ona:
1. Dekretu-Lei ne’ebé mak aprova Segunda Alterasaun ba Rejime Konkursu, Rekrutamentu, Selesaun no Promosaun Pesoál ba Administrasaun Públika
Konsellu Ministru aprova ona Dekretu-Lei ne’ebé mak aprova segunda alterasaun ba Rejime Konkursu, Rekrutamentu, Selesaun no Promosaun Pesoál ba Administrasaun Públika ne’ebé mak determina katak kontratadu sira ne’ebé kumpri prazu mínimu kontratu fulan neen iha loron 30 fulan Juñu tinan 2011, bele integra ba karreira Administrasaun Públika nian.
2. Dekretu-Lei ne’ebé mak aprova Regulamentu Disiplina PNTL nian
Haree ba nesesidade atu altera Regulamentu PNTL nian hodi korrije buat hirak ne’ebé la loos, nune’e mós esplikasaun ba konseitu sira hodi halo tuir loloos ba lian tetun, no haree katak volume ba alterasaun sira signikativu ona, Konsellu Ministru deside atu dada sai tiha Dekretu-Lei n.o 13/2004 loron 16 fulan Juñu no aprova fali Dekretu-Lei foun ne’e. Hakarak alterasaun ne’e hetan interpretasaun ida ne’ebé mak di’ak liu no aplikasaun ba diploma ida ne’e duni.
Konsellu Ministru analiza mós:
1. Relatóriu Progresu “Suai Suplly Base”
Sekretaria Estadu Rekursu Naturál aprezenta ona relatóriu ida, ne’ebé Eastlog mak halo, kona-ba estudu konjuntu ida ba viabilidade konstrusaun no operasaun ba baze fornesimentu lojístiku ida iha Suai. Estudu ne’e ekipa rua téknika no komersiál mak halo hodi bele analiza potensiál tékniku no mós komersiál. Fatin ne’e bele duni no investimentu sei lori benefísiu, inklui ba komunidade, tanba sei hamosu servisu oioin.
Hanesan aprezaenta ona, sei sai hanesan pontu ida hodi dada investimentu tanba nia besik portu ne’e, sei dezenvolve infra-estrutura oin-oin, liu-liu kona-ba nível transporte sira, bele dehan katak kriasaun empregu aumenta tebe-tebes, hanesan atividade industriál no aleinde buat sira seluk, iha posibilidade atu faan terrenu indústrial, nune’e mós Governu bele hetan fila lalais lukru hosi investimentu ne’e.
2. Rejime Jurídiku Aprovizionamentu Konsolidadu
Konsellu Ministru rona aprezentasaun Dekretu-Lei husi Ministériu Finansa, kona-ba Aprovizionamentu Públiku Républika Demokrátika Timor-Leste nian ne’ebé mak kodifika Dekretu hotu ne’ebé relevante no sei vigora hela iha lei ida de’it. Diploma ne’e konserva esénsia lei nian ne’ebé iha tiha ona, define pasu hirak atu tuir no métodu sira atu utiliza ba atividade aprovizionamentu nian, hodi reforsa relasaun kualidade/kustu. Relasaun ida ne’e halo parte, no hetan definisaun hela, iha prosedimetu aprovizionamentu nian ne’ebé hatama iha dokumentu padraun formuláriu konkursu no kontratu nian.
3. Planu Estratéjiku ba Servisu Reinsersaun Sosiál nian
Planu Estratéjiku ba Servisu Reinsersaun Sosiál, aprezenta ona iha Sorumutu Konsellu Ministru ohin nian, integra informasaun kona-ba sistema jurídiku Timor-Leste nian, metodolojía intervensaun Diresaun Nasionál ba Servisu Prizionál no Reinsersaun Sosiál Ministériu Justisa nian no ezemplu sira ne’ebé relasiona ho prátika intervensaun nian iha reinsersaun sosiál ba ema sira ne’ebé mak halo tiha ona krime.
Objetivu planu ne’e nian mak definisaun ba desizaun polítika-estratéjiku setór ne’e no dezenvolvimentu no implementasaun ba metodolojia servisu nian ne’ebé mak permite, ba servisu públiku sira, hatán ba ezijénsia legál sira kona-ba ezekusaun ba pena no medida sira ne’ebé bele hasai ka la hasai liberdade ema nian.
