Vise-Ministru Komérsiu, Augusto Júnior Trindade, aborda oinsá Timor-Leste bele aumenta asesu ba merkadu internasionál, hametin negósiu lokál no hamenus dependénsia ba importasaun iha epizódiu foun programa “Página do Governo”. Entrevista ne’ebé Nélia Chaves aprezenta sei transmite iha RTTL, loron sesta-feira, fulan-novembru 2026, tuku 7 kalan.
Durante entrevista, Vise-Ministru esplika katak Timor-Leste nia adezaun ba Organizasaun Mundiál Komérsiu (OMK) no Asosiasaun Nasoens Sudeste Aziátiku (ASEAN) loke asesu ba merkadu luan liu ba produtór lokál sira. Nia subliña katak negósiu lokál presiza apoiu atu bele kompete iha merkadu hirak-ne’e, no hato’o katak Governu halo esforsu atu harmoniza lejislasaun nasionál ho padraun internasionál no simplifika prosesu lisensiamentu komersiál.
Tuir Vise-Ministru, Ministériu Komérsiu no Indústria fó apoiu ba mikroempreza no empreza ki’ik hamutuk 1.307. Nia esplika katak sentru inkubasaun negósiu ministériu nian ajuda empreendedór sira atu elabora planu negósiu, hadi’a kontabilidade no prepara formalizasaun sira-nia atividade. Nia mós esplika oinsá ministériu servisu hamutuk ho ofisiál munisipál no autoridade fiskalizasaun sira atu monitoriza stok, folin no distribuisaun sasán esensiál.
Membru Governu ne’e aprezenta mós planu ba parke industriál ida ne’ebé sei funsiona nu’udar sentru ba prosesamentu no distribuisaun produtu lokál ba venda iha merkadu nasionál no ba esportasaun. Nia hatete katak konstrusaun depende ba finalizasaun projetu tékniku sira no rezolusaun ba kestaun kona-ba rai. Entrevista ne’e aborda mós esforsu atu simplifika servisu sira liuhusi lisensiamentu eletróniku, asinatura eletrónika no pagamentu eletróniku.
Governu konvida populasaun tomak atu akompaña edisaun “Página do Governo” ida-ne’e, iha sesta-feira, loron 20 fulan-novembru tinan 2026, oras tuku 7 kalan, iha RTTL no mídia sosiál sira.
Programa “Página do Governo” hanesan inisiativa ida hosi Gabinete Portavós Governu nian, ne’ebé lidera hosi Ministru Prezidénsia Konsellu Ministrus, Agio Pereira, iha parseria ho RTTL no mídia nasionál sira.
Ho Nélia Chaves nu’udar entrevistadora no Ika Moniz nu’udar produtora ezekutiva, programa ne’e hetan apoiu tékniku hosi ekipa komunikasaun Prezidénsia Konsellu Ministrus, Gabinete Primeiru-Ministru no gabinete membru Governu ne’ebé hetan entrevista, no sai nu’udar espasu komunikasaun institusionál ida ne’ebé sentra ba interese públiku no hakbesik Governu ho sidadaun sira.