Ministru Negósiu Estranjeiru , Zacarias da Costa, partisipa Diálogu Ministeriál Sudoeste Pasífiku dasiak ne’ebé mak hala’o iha loron 21 fulan Abril, iha Bali.

Durante sorumutu ne’ebé hala’o hafoin iha simeira ba ministru Negósiu Estranjeiru Asosiasaun  Nasoens Sudeste Aziátiku (ASEAN) nian, Zacarias da Costa, hateten katak, Fórum Demokrasia Bali importante tebes  no  afirma dala ida tan kompromisu  Timor-Leste  atu  promove,  ho  país-membru sira, atu estuda klean liu kona-ba demokrasia no diálogu ba dame no prosperidade iha rejiaun.

Durante sorumutu ne’e, ministru sira diskute no troka hanoin sira kona-ba kestaun ne’ebé relasiona ho seguransa marítima, asisténsia umanitária ba desastre sira, kombate terorizmu, demokrasia no halo ligasaun entre povu sira, nune’e mós kestaun seluk ne’ebé relasiona ho dezenvolvimentu iha rejiaun. Ministru Negósiu Estranjeiru mak lidera diskusaun kona-ba demokrasia no louva tebes kompromisu país sira hotu nian, membru Diálogu Sudoeste Pasífiku nian, hodi defende prinsípiu demokrátiku, direitu umanu no governasaun di’ak.

Ministru Negósiu Estranjeiru Austrália, Kevin Rudd, mak prezide Diálogu Ministeriál Suoeste Pasífiku dasiak nian, no konta ho partisipasaun husi nia kolega sira mak hanesan, husi Indonesia, Marty Natalegawa, Nova Zelándia, Murray McCully, Papua-Nova Guiné,Ano Pala no Sekretáriu Relasaun Esteriór Filipina nian, Albert del Rosário.

Direktór-Jeral ba Asuntu Rejionál nian, Marciano da Silva, Embaixadór  sira, Juvêncio Martins, Roberto Soares no Manuel Serrano nune’e mós Xefe Gabinete, João Tavares, hola parte iha komitiva ne’ebé mak akompaña Ministru Zacarias da Costa.