Sekretaria Estadu Formasaun Profisionál no Empregu (SEFOPE) ho Timor-Leste Airlines (TLA), iha loron 14 fulan Jullu, asina nota entendimentu ida ho objetivu atu servisu hamutuk iha kapasitasaun profisionál ba timoroan sira.

“Asina akordu ne’e hanesan sinál di’ak ida hosi setór privadu, iha prosesu dezenvolvimentu nasionál. Tanba ho investimentu ne’ebé mak kompañia TLA investe iha Timor-Leste bele fó no loke kampu servisu ba juventude sira iha futuru”, hateten Sekretáriu Estadu, Bendito Freitas.

Iha biban ne’e mós Bendito Freitas husu ba timoroan sira ne’ebé mak agora servisu iha kompañia privadu ne’e atu bele sai hanesan embaixadór Timor-Leste ba mundu tomak liu hosi sira nia profisionalizmu atu servisu ho dixiplina. Nune’e bele promove ita-nia Nasaun Timor-Leste ba mundu seluk ho objetivu atu atrai turista mai ita-nia rai.

Administradór TLA, Vasco Carrascalão da Silva, iha nia diskursu hateten katak, asina nota entendimentu ho SEFOPE ne’e hanesan pasu importante ida hodi kontribui ba prosesu dezenvolvimentu nasionál Nasaun ida ninian. “Tanba ne’e TLA sempre iha vontade atu fó apoiu atu hasa’e kapasidade empregu no kualifikasaun ba trabaladór sira nian”, tenik Nia.