Sekretaria Estadu Promosaun Igualdade (SEPI), loron 14 fulan Jullu 2011 iha salaun Madre Kanossa Bekora, Dili, realiza sorumutu Nasionál ba Feto, ne’ebé ko’alia kona-ba “Lisaun sira Aprendizajen kona-ba Feto Iha Moris Polítika” no instrumentu legál nasionál no internasionál sira ne’ebé garante feto nia direitu. Objetivu hosi sorumutu ne’e mak, feto potensiál sira bele hatene katak, sira iha direitu, atu partisipa iha vida polítika.

“Hanesan ita akompaña, ita iha tiha ona aprovasaun lei eleitorál no mós Timor-Leste agora daudauk hala’o preparasaun eleisaun jerál  2012 nian, tanba ne’e mak hala’o sorumutu nasionál ho reprezentante distritu 13, liu-liu ba iha membru konsellu suku sira, ne’ebé iha poténsia tebe-tebes, atu prepara sira nia an, oinsá mak entre reprezentante nivél komunitária ho feto sira iha nivél nasionál, atu bele fahe esperiénsia ba malu no prepara estratéjia hodi bele iha planu atu asegura eleisaun feto iha parlamentu 2012,” hateten sekretária Estadu ba Promosaun Igualdade, Idelta Rodrigues.

Iha biban ne’e mós, prezidente Repúblika Demokrátika Timor-Leste, José Ramos-Horta, hateten katak sorumutu ohin nian, importante tebe-tebes tanba eleisaun 2012 besik ona, no bele hatudu buat barabarak ne’ebé ita no sosiedade iha, konsege hetan iha tinan sira-nia laran, maturidade demokrátika, no  polítika, ho ita-nia kapasidade atu garante dame no unidade iha nasaun ne’e nia laran.

Ramos-Horta hateten eleitoradu mak sei haree, partidu polítiku sira mak haree kandidatu ne’ebe di’ak, ita hatene ita tenke tau feto, entaun ita buka feto ne’ebé iha kredibilidade, autoridade, istória luta, kompeténsia no buat oin-oin, atu nune’e nia ba parlamentu, podér ezekutivu bele servi duni ho integridade no kompentésia.

Koordenadór Kooperasaun Española iha Timor, Javier José Claviño Pazos, esplika katak, Paz y Desarrolo (PYD), agora daudaun implementa projetu rejionál, kona-ba promove igualdade jenéru, iha partisipasaun polítika. Ninia objetivu ba Timor-Leste mak atu promove partisipasaun feto, iha polítika no sivil, iha nivel suku, fó apoiu ba membru konsellu suku feto no mane, atu hala’o sira nia atividade loron-loron, identifika no akompaña feto potensiál ba eleisaun tuir mai.

Partisipa iha sorumutu ne’e Prezidente Repúblika Demokrátika Timor-Leste, José Ramos-Horta, prokuradora Jerál, Ana Pessoa, sekretáriu Estadu Promosaun Igualdade, Idelta Rodrigues, Prezidente Grupu Feto Parlamentu Timor-Leste, Josefa Pereira, reprezentante Paz y Desarrollo iha Timor-Leste, Membru Konsellu suku sira, reprezentante hosi suku iha distritu hotu, doadór sira, NGO Internasionál no Lokál.