Timor-Leste simu medalla Osan mean no Bronze iha Athena
Timor-Leste simu medalla osan mean 3 no bronze 1 iha eventu “Special Olimpic” iha Athena-Grésia ne’ebé hala’o iha loron 25 fulan Juñu to’o loron 4 fulan Jullu 2011
Nasaun ne’ebé partisipa iha eventu ne’e hamutuk 185 ho modalidade kompetisaun nian hamutuk 22. Timor-Leste kompete de’it iha modalidade tolu (3), hanesan futeból, halai taru (atletismu) no boccia (soe bola).
“Ha’u hakarak hato’o parabens ba atleta defisiente sira tanba maske ho kondisaun la normál, maibé konsege hamorin ita nia nasaun iha Athena-Yunani,”tenik Manetelu.
Atleta defisiente sira ne’ebé simu medalla ne’e mak hanesan, Pacheco Carlito da Silva, hetan medalla osan mean hosi modalidade atletismu (long jump), ho valór metru 3,52, Virgina Alves Magno, hetan medalla osan mean hosi modalidade atletismu (halai taru) 200m, manaan ho valór oras minutu 18.45. Joana hetan medalla osan mean hosi modalidade Boccia (so’e bola) no medalla bronze simu hosi Pacheco Carlito da Silva iha modalidade atletismu (halai taru) 100m, ho valór oras 16,98.
