Vise-Primeiru-Ministru ho Sekretáriu-Jerál ASEAN diskute kona-ba integrasaun ekonómika no preparasaun ba Prezidénsia tinan 2029
O Vise-Primeiru-Ministru, Ministériu Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, iha loron 2 fulan-novembru tinan 2026 hasoru-malu ho Sekretáriu-Jerál Asosiasaun Nasoins Sudeste Aziátiku (ASEAN), Kao Kim Hourn, iha sede organizasaun nian iha Jakarta, Indonézia, atu ko’alia kona-ba prosesu integrasaun Timor-Leste nian ba organizasaun rejionál ne’e, kompromisu ekonómiku sira ne'ebé pendente hela, no mós preparasaun sira ba Prezidénsia ASEAN nian iha 2029.
Sorumutu ne’e realiza hafoin aniversáriu ba dahuluk adezaun plena Timor-Leste nian ba ASEAN, ne’ebé formaliza iha loron 26 fulan-outubru tinan 2025, no foka liu ba kumprimentu kritériu prinsipál sira ne'ebé pendente hela iha roteiru adezaun nian, liuliu kompletasaun hosi prosesu adezaun ba akordu ekonómiku sira seluk organizasaun nian no kondisaun sira ne'ebé nesesáriu ba ninia implementasaun.
Durante sorumutu, Francisco Kalbuadi Lay aprezenta balansu ida ba tinan dahuluk Timor-Leste nia partisipasaun hanesan Estadu-Membru, liuliu iha área institusionál, ekonómiku, infraestruturas, seguransa no diplomasia. Ko’alia mós preparasaun nasionál ba ezersísiu Prezidénsia ASEAN, iha tinan 2029.
Sekretáriu-Jerál, Kao Kim Hourn, reafirma disponibilidade Sekretariadu ASEAN nian atu kontinua fó apoiu tékniku ba Timor-Leste iha kumprimentu ba kompromisu sira ne'ebé asume ona iha ámbitu organizasaun nian.
Delegasaun nasionál ne'e inklui Ministru Transportes no Komunikasoins, Miguel Marques Gonçalves Manetelu, Ministru Interiór, Francisco da Costa Guterres, Vise-Ministru Komérsiu no Indústria, Augusto Júnior Trindade, Embaixadór Timor-Leste nian ba Indonézia, Roberto Sarmento de Oliveira Soares, no Embaixadora Timor-Leste nian ba ASEAN, Elisa da Silva.
Iha ámbitu dezlokasaun ne’e, Sekretáriu-Jerál ASEAN oferese mós jantár ofisiál ida hodi fó onra ba Vise-Primeiru-Ministru iha loron 2 fulan-novembru, ne'ebé sai oportunidade adisionál ida ba diálogu kona-ba partisipasaun Timor-Leste nian iha inisiativa sira organizasaun rejionál nian.
