Ministériu Solidariedade Sosiál no Inkluzaun, hosi loron 23 to’o 29 fulan-outubru tinan 2026, hala’o atividade lubuk ida iha Munisípiu Manatutu, Ermera no Autoridade Administrativa Ataúru, ne’ebé ho objetivu atu akompaña família sira ne’ebé iha situasaun vulneravel, fó apoiu ai-han, halo monitorizasaun ba Bolsa da Mãe Kondisionál no identifika nesesidade hosi ema ho defisiénsia sira. 

Atividade sira ne’e akompaña direta iha terrenu hosi Ministra Solidariedade Sosiál no Inkluzaun, Verónica das Dores, no mós Vise-Ministra, Céu Brites, no inklui vizita ba komunidade no uma sira, kontaktu ho benefisiáriu sira husi programa protesaun sosiál, no mós koordenasaun ho autoridade lokál no servisu sira iha setór sosiál, saúde, edukasaun, reabilitasaun no dokumentasaun sivíl.

Iha munisípiu Ermera, entre loron 26 no 28 fulan-outubru, Ministra Verónica das Dores akompaña distribuisaun ai-han no pakote komplementár ba benefisiáriu 2.055 husi suku Parami, Laklo, Malabe, Tiarlelo, Baboe Kraik, Baboe Leten no Leimea Leten, iha Postu Administrativu Atsabe. Intervensaun ne’e responde ba nesesidade sira ne’ebé identifika ona husi autoridade lokál sira relasiona ho família sira ne’ebé iha situasaun vulneravel.

Durante dezlokasaun ba Atsabe, Ministra mantein kontaktu diretu ho komunidade sira hodi hatene sira-nia kondisaun no nesesidade.

Atividade ida-ne’e hala’o hafoin dezlokasaun Ministra nian iha loron 23 fulan-outubru ba bairru Limbaba, aldeia Ilimanu, suku Uma-Kaduak, Postu Administrativu Laklo, munisípiu Manatutu. Iha komunidade ne’ebé difisil atu asesu bá, identifika uma-kain hamutuk 19 mak iha situasaun vulneravel, ne’ebé tuirmai sira simu asisténsia alimentár komplementár. Hafoin avaliasaun ne’ebé hala’o iha fatin, Ministériu determina atu fó apoiu umanitáriu kada fulan ba família sira-ne’e.

Iha Ataúru, iha loron 28 no 29 fulan-outubru, Vise-Ministra Céu Brites akompaña intervensaun ida ne’ebé integradu iha komunidade Atekru, Adara, Maker no Vila Maumeta ne’ebé tau-hamutuk protesaun sosiál, saúde, reabilitasaun no asesu ba dokumentasaun.

Iha Eskola Bázika Filial Atekru no Eskola Bázika Sentrál Pérola, iha Vila Maumeta, Vise-Ministra hasoru-malu ho estudante sira no ida-idak nia inan-aman no tutór sira hodi akompaña implementasaun Bolsa da Mãe Kondisionál no sensibiliza família sira hodi utiliza apoiu tuir objetivu programa nian, liuliu atu responde ba nesesidade edukasaun, saúde no dezenvolvimentu labarik sira nian.

Iha Atekru, Adara no Maker, ekipa fó mós apoiu ai-han ba família vulneravel 250. Atividade sira iha Ataúru, inklui mós konsulta médika, dentária no oftalmolójika, distribuisaun ókulu gratuitu, apoiu ai-han suplementár ba labarik sira ho idade to’o tinan lima, no mós informasaun ba komunidade sira kona-ba asesu ba dokumentasaun ne’ebé presiza hodi hetan benefísiu hosi servisus no programas públikus.

Vise-Ministra mós halo vizita domisiliária ba ema ho defisiénsia sira iha aldeia Maker no Eklae, hodi identifika nesesidade espesífika, fó apoiu pontuál no fasilita dalan ba servisu espesializadu sira. Entre apoiu sira ne’ebé fó ne’e mak entrega kadeira roda ida.

Atividade sira ne’ebé hala’o iha Manatutu, Ermera no Ataúru permite ba Ministériu atu akompaña diretamente benefisiáriu sira hosi programa protesaun sosiál no mós identifika nesesidade iha komunidade nia leet, liuhusi koordenasaun entre servisu públiku no autoridade lokál sira.