Ministru Prezidénsia Konsellu Ministrus, Agio Pereira, hasoru malu iha loron 29 fulan-outubru 2026, iha Dili, ho Reprezentante Rezidente Programa Nasoins Unidas nian ba Dezenvolvimentu (PNUD) iha Timor-Leste, Katyna Argueta, no reprezentante sira husi PNUD no Delegasaun Uniaun Europeia iha Timor-Leste, hodi diskute Governu nia prioridade sira ba transformasaun dijitál no koordenasaun apoiu ne’ebé fornese liuhosi projetu Dalan Dijitál. 

Iha enkontru ne’e, Ministru aprezenta prioridade nasionál sira ba transformasaun dijitál servisus públikus nian no mós serbisu ne’ebé hala’o iha ámbitu Komisaun Interministeriál Siberseguransa no Dijitalizasaun Servisus Estadu nian, ne’ebé nia prezide. Enkontru ne’e mós nu’udar oportunidade ba diskusaun kona-ba oinsá projetu Dalan Digital bele apoia prioridade sira-ne’e, iha koordenasaun ho instituisaun nasionál sira ne’ebé responsavel.

Projetu “Dalan Dijitál – A New Path for Digital Citizenship in Timor-Leste”, ne’ebé finansia husi Uniaun Europeia no implementa husi PNUD iha parseria ho Ministériu Justisa, Ministériu Transportes no Komunikasoins, no mós Ministériu Administrasaun Estatál, apoia dezenvolvimentu kuadru jurídiku no regulamentár, infraestrutura públika dijitál no interoperabilidade, nune’e mós reforsu kapasidade institusionál no literasia dijitál.