Iha loron 27 fulan-outubru tinan 2026, Ministru Justisa, Sérgio de Jesus Fernandes Hornai, hasoru-malu ho Ministra Justisa Portugál, Rita Alcatrão Júdice, iha Dili, hodi ko’alia kona-ba reforsu kooperasaun bilaterál iha setór justisa, ho énfaze ba utilizasaun teknolojia iha servisus Justisa no ba rejistu rai nian. Sorumutu ne’e hala’o durante Konferénsia Ministru Justisa sira hosi País Lian ofisiál Portugés(CMJPLOP- sigla iha lian portugés) nian ba da-19. 

Durante sorumutu, Ministru na’in-rua ko’alia kona-ba reforsu kooperasaun institusionál entre ida-idak nia Ministériu, iha ámbitu instrumentu kooperasaun ne’ebé iha, no mós fahe koñesimentu, experiénsia no prátika sira ne’ebé di’ak-liu entre instituisaun sira hosi país rua ne’e.

Entre área sira ne’ebé diskute mak utilizasaun teknolojia iha servisus Justisa no rejistu rai nian, iha kontextu modernizasaun servisus públikus no mós reforsu kapasidades institusionais. Ko’alia mós kona-ba posibilidade interkámbiu tékniku no institusionál, identifikasaun ba área foun sira kolaborasaun nian, no mós dezenvolvimentu inisiativa konjunta.

Sorumutu ne’e kontinuidade hosi diálogu ne’ebé hala’o entre governante na’in-rua iha Lizboa, iha loron 24 fulan-juñu tinan ida-ne’e. Iha enkontru ne’ebá, delegasaun rua ko’alia kona-ba progresu kooperasaun bilaterál no ko’alia kona-ba formasaun rekursus umanus, kapasitasaun ba autoridade judisiária timoroan sira, apoiu ba Sentru Formasaun Jurídika no Judisiária (CFJJ, sigla iha lian portugés), no mós modernizasaun ba servisus rejistus no notariadu.

Iha sorumutu fulan-juñu ne’e, ko’alia mós kona-ba kontinuidade apoiu Portugál nian ba CFJJ, inklui programa Formasaun ba Formadór Jurídiku timoroan sira, ne’ebé prevee ba tinan 2027.

Sorumutu bilaterál ne’e hala’o iha kontextu XIX CMJPLOP, ne’ebé halibur responsavel sira hosi setór Justisa Estadus-Membrus CPLP nian iha Dili hodi reforsa kooperasaun jurídika no judisiária, fahe experiénsia no koordenasaun institusionál.

Ministru na’in-rua reafirma importánsia atu fó kontinuidade ba diálogu no artikulasaun entre Ministériu ida-idak, ho objetivu atu reforsa relasaun bilaterál no dezenvolvimentu mekanizmu sira kooperasaun nian ne’ebé tuir nesesidade no prioridade país rua nian.

Partisipa iha sorumutu ne’e diretores hosi servisus Ministériu Justisa Timor-Leste nian, Embaixadór Portugál ba Timor-Leste, Duarte Bué Alves, no membru delegasaun sira-seluk hosi Portugál.