Durante entrevista, Sekretáriu Estadu aprezenta prioridade sira husi Governu Konstitusionál IX iha área protesaun sivíl, nomeadamente reforsu kapasidade operasionál no lojístika, sistema alerta sedu, preparasaun no resposta ba dezastre, desentralizasaun servisu sira no envolvimentu komunidade sira iha redusaun risku dezastre.

Programa ne’e aborda mós estabelesimentu númeru úniku emerjénsia 115, mekanizmu alerta ba populasaun, kapasidade bombeirus no reforsu sistema integradu komunikasaun entre Autoridade Protesaun Sivíl, F-FDTL no Polísia Nasionál Timor-Leste.

Entrevista ne’e mós aprezenta medida sira ba preparasaun hasoru risku dezastre, apoiu ba populasaun sira ne’ebé afetadu hosi situasaun emerjénsia no atensaun ba grupu vulnerável sira.

Programa “Página do Governo” promove hosi Gabinete Portavós Governu, ne’ebé lidera hosi Ministru Prezidénsia Konsellu Ministrus, Agio Pereira, no produz iha parseria ho RTTL no órgaun komunikasaun sosiál nasionál sira, ho objetivu atu reforsa transparénsia governativa, prestasaun kontas no asesu sidadaun sira-nian ba informasaun kona-ba desizaun prinsipál no polítika públika sira Ezekutivu nian.

Ho Nélia Chaves nu’udar entrevistadora no Ika Moniz nu’udar produtora ezekutiva, programa ne’e hetan apoiu tékniku hosi ekipa komunikasaun Prezidénsia Konsellu Ministrus, Gabinete Primeiru-Ministru no gabinete membru Governu ne’ebé hetan entrevista, no sai nu’udar espasu komunikasaun institusionál ida ne’ebé sentra ba interese públiku no hakbesik Governu ho sidadaun sira.

Governu konvida populasaun tomak atu akompaña programa “Página do Governo” edisaun ida-ne’e, iha sesta-feira, loron 30 fulan-outubru tinan 2026, tuku 7 kalan, iha RTTL no mídia sosiál sira.

Programa hotu ne’ebé transmite ona disponivel iha kanál YouTube @PCMPAGINADOGOVERNOTIMORLESTE