Iha loron 26 fulan-outubru tinan 2026, iha Jakarta, Vise-Primeiru-Ministru, Ministru Koordenadór Asuntus Sosiais no Ministru Interinu Ensinu Superiór, Siénsia no Kultura, Mariano Assanami Sabino, hasoru malu ho Vise-Ministru Ensinu Superiór, Siénsia no Teknolojia Indonézia nian, Fauzan, hodi ko’alia kona-ba reforsu kooperasaun entre país rua iha área ensinu superiór, peskiza sientífika no dezenvolvimentu rekursus umanus.

Enkontru ne’ebé hala’o iha instalasaun Ministériu Ensinu Superiór, Siénsia no Teknolojia Indonézia nian, ko’alia kona-ba dezenvolvimentu rekursus umanus, peskiza konjunta, interkámbiu estudante, no mós reforsu kapasidade instituisaun ensinu superiór sira país rua ne’e nian.

Tuir dadus ne’ebé Ministériu Indonézia nian divulga ona, estudante timoroan na’in-5.700 maka daudaun ne’e hala’o estudu iha instituisaun ensinu superiór sira iha Indonézia. Kooperasaun entre instituisaun sira iha país rua ne’e abranje parseria entre universidade, peskiza konjunta, no mós interkámbiu dosente no estudante sira, liuhusi programa bolsa estudu no parseria oioin entre instituisaun ensinu superiór sira.

Iha enkontru ne’e, sira diskute posibilidades atu dezenvolve projetu konjuntu kona-ba peskiza iha área saúde, peskas no biodiversidade, inklui estudu kona-ba moras, rekursus akuátikus, no espésie lokál sira, hodi apoia dezenvolvimentu koñesimentu sientífiku no mós hatán ba nesesidade dezenvolvimentu país rua ne’e nian.

Parte rua ko’alia mós kona-ba reforsu kapasidade dosentes, dezenvolvimentu karreiras akadémikas no interkámbiu estudante sira.

Asuntu sira seluk ne’ebé ko’alia maka situasaun administrativa estudante estranjeiru sira nian, inklui prosedimentu relasiona ho vistu no autorizasaun rezidénsia ba objetivu estudu nian.

Enkontru ne’e inklui diskusaun kona-ba atualizasaun Memorandu Entendimentu entre Indonézia no Timor-Leste iha área ensinu superiór, ne’ebé ninia vijénsia sei remata iha tinan 2027, nu’udar parte hosi kontinuidade kooperasaun entre país rua, inklui iha kontestu adezaun Timor-Leste ba ASEAN.

Enkontru ida-ne’e fó kontinuasaun ba kontaktu sira ne’ebé instituisaun sira husi país rua ne’e hala’o ona, inklui vizita Vise-Primeiru-Ministru nian ba Universidade Brawijaya, iha Malang, iha loron 4 no 5 fulan-outubru, iha ne’ebé asina memorandu entendimentu rua iha área ensinu superiór, peskiza sientífika no dezenvolvimentu rurál.