Ohin, 26 fulan-outubru tinan 2026, iha Dili, hahú Konferénsia Ministrus Justisa husi País Lian Ofisial Portugés (CMJPLOP, sigla iha lian portugés) nian ba dala 19, ne’ebé halibur responsavel  governamentál sira husi  área Justisa nian husi Estadus-Membrus Komunidade País Lian Portugeza (CPLP) nian, atu reforsa kooperasaun jurídika no judisiária no mós analiza resposta konjunta ba dezafiu sira ne’ebé hamosu husi krime organizadu transnasionál. 

Konferénsia ne’e, ne’ebé hala’o to’o aban, 27 fulan-outubru, ho nia tema “Reforsa Kooperasaun Judisiária entre Estadus-Membrus CPLP nian  atu Kombate Krime Organizadu Transnasionál, Fraude Dijitál no Jogu Ilegál”.

Sorumutu ne’e ho objetivu atu kontribui ba reforsu  koordenasaun entre Estadus-Membrus iha área prevensaun, investigasaun no kooperasaun judisiária internasionál, liuliu hodi fó atensaun ba fenómenu kriminál sira ne’ebé hakat liu fronteira nasionál no uza teknolojia dijitál.

Entre tópiku sira ne’ebé mak analiza hela maka burlas no forma sira seluk husi fraude dijitál, jogu ilegál, tráfiku umanu, brankeamentu kapitál, finansiamentu terrorizmu, tráfiku droga, no mós atividade ilísitu sira seluk ne’ebé dezenvolve husi estrutura krime organizadu.

Sorumutu  ne’e mós sai hanesan espasu ida atu fahe esperiénsia no prátika di’ak  sira, hametin kooperasaun penál bilaterál no multilaterál, no mós identifika mekanizmu sira ne’ebé kontribui ba haforsa  kapasidade instituisaun setór justisa nian sira hosi Estadus-Membrus.

Iha ámbitu atividade ne’e, sei diskute mós Deklarasaun Dili ida, ne’ebé ho objetivu atu estabelese matadalan komún hodi hametin kooperasaun entre Estadus-Membrus iha  kombate ba krime organizadu transnasionál, ne’ebé inklui iha área prevensaun, investigasaun no kooperasaun internasionál.

CMJPLOP nu’udar mekanizmu ida ba koordenasaun no kooperasaun jurídika no judisiária entre país lian portugeza sira, iha ne’ebé diskute asuntu sira ne’ebé sai interese komún, avalia inisiativa sira ne’ebé la’o hela no identifika área foun  sira kolaborasaun nian.

Hala’o Konferénsia iha Dili nu’udar parte hosi responsabilidade ne’ebé Timor-Leste asume iha ezersísiu Prezidénsia Pro Tempore CPLP nian no fó kontinuidade ba  kooperasaun entre Estadus-Membrus iha área  Justisa nian.