Ministru Prezidénsia Konsellu Ministrus, Agio Pereira, iha sesta-feira 23 fulan-outubru tinan 2026, hasoru malu ho Didina Coelho da Silva, espesialista jurídika husi Sentru Komérsiu Internasionál (ITC), iha Palásiu Governu, Dili.  Sorumutu ne’e ho objetivu atu aprezenta instituisaun ne’e no fahe informasaun kona-ba servisu ne’ebé organizasaun ne’e halo hodi apoia Timor-Leste.

Iha enkontru ne’e, aprezenta serbisu ne’ebé durante ne’e Sentru Komérsiu Internasionál halo iha país ne’e, liuliu iha área asisténsia téknika no reforsu kapasidade nasionál sira ba implementasaun kompromisu sira ne’ebé mosu hosi akordu ekonómiku no komersiál Asosiasaun Nasoins Sudeste Aziátiku (ASEAN) nian.

Sorumutu ne’e mós fó oportunidade hodi ko’alia kona-ba inisiativas apoiu tékniku relasiona ho integrasaun ekonómika rejionál Timor-Leste nian, inklui serbisu hodi avalia preparasaun nasionál nian ba Akordu-Kuadru ASEAN kona-ba Ekonomia Dijitál (ASEAN Digital Economy Framework Agreement – DEFA).

Sorumutu ne’e hanesan oportunidade ida atu troka informasaun kona-ba área kooperasaun ne’ebé la’o hela, no mós kona-ba importánsia akompañamentu tékniku no reforsu kapasidade institusionál ba prosesu integrasaun Timor-Leste iha mekanizmu ekonómiku no komersiál ASEAN nian.

Sentru Komérsiu Internasionál (ITC), ajénsia konjunta husi Organizasaun Mundiál Komérsiu (OMC) no Nasoins Unidas, liuhusi Konferénsia Nasoins Unidas kona-ba Komérsiu no Dezenvolvimentu (CNUCED, sigla iha lian portugés), agora daudaun hala’o hela projetu ida ne’ebé finansia hosi Uniaun Europeia hodi apoia integrasaun rejionál no komérsiu Timor-Leste nian. Iha ámbitu projetu ida-ne’e nian, ITC dezenvolve atividade sira asisténsia téknika nian ho objetivu atu hametin kapasidade komersiál no institusionál sira nasaun ne’e nian, hodi kontribui ba ninia integrasaun iha ekonomia rejionál no internasionál.