Governu Timor-Leste

Ministru Prezidénsia Konsellu Ministrus, Agio Pereira, iha loron 22 fulan-outubru tinan 2026, iha Palásiu Governu, Dili, hasoru-malu ho Ajente Ligasaun Polísia Nova Zelándia ba Migrasaun Irregulár, Tim Chao, ne’ebé akompaña hosi Embaixadora Nova Zelándia nian ba Timor-Leste, Helen Tunnah, hanesan parte husi vizita serbisu ne’ebé responsavel Polísia Nova Zelándia nian hala’o iha país ne’e, entre loron 19 no 24 fulan-outubru. 

Sorumutu ne’e fó oportunidade atu ko’alia kona-ba relasoins bilaterais entre Timor-Leste no Nova Zelándia no área sira interese komún nian, ho atensaun partikulár ba kooperasaun hodi kombate krime organizadu transnasionál no migrasaun irregulár.

Durante sorumutu ne’e, ko’alia kona-ba prioridade Timor-Leste nian iha área sira-ne’e no mós posibilidade atu hametin kooperasaun, liuliu liuhosi fahe informasaun no esperiénsia sira, hasa’e kapasidade no hametin koordenasaun entre instituisaun kompetente sira husi país rua ne’e.

Tim Chao destakadu iha Embaixada Nova Zelándia iha Jakarta no hala’o funsaun nu’udar Ajente Ligasaun ba Migrasaun Irregulár, ho akreditasaun iha Timor-Leste. Nia iha esperiénsia kona-ba ba investigasaun kriminál liu tinan 30, inklui iha área kombate tráfiku droga, krime organizadu, intelijénsia no rekuperasaun ativus. Hosi tinan 2019 to’o 2023, nia dezempeña funsaun nu’udar Ajente Ligasaun Polísia Nova Zelándia nian iha Europol, iha Haia.

Vizita mai Timor-Leste ne’e inklui programa sorumutu ida ho responsavel instituisaun nasionál relevante sira, ho objetivu atu promove diálogu kona-ba dezafiu sira ne’ebé relasiona ho krime organizadu transnasionál no migrasaun irregulár, no mós fó kontinuasaun ba kooperasaun ne’ebé eziste ona iha área sira-ne’e.

Tim Chao mai ona Timor-Leste iha fulan-abril tinan ida-ne’e, iha vizita serbisu nian ida, iha ne’ebé nia hala’o sorumutu ho responsavel sira husi instituisaun nasionál sira ne’ebé ligadu ho seguransa no investigasaun kriminál, inklui Polísia Nasionál Timor-Leste (PNTL) no Polísia Sientífika Investigasaun Kriminál (PCIC, sigla iha lian portugés). Aleinde matéria sira seluk, sorumutu sira-ne’e ko’alia kona-ba migrasaun irregulár, prevensaun no kombate krime transnasionál, no mós kooperasaun entre autoridades Timor-Leste no Nova Zelándia.