Governu Timor-Leste

Vise-Primeiru-Ministru, Ministru Koordenadór Asuntus Sosiais no Ministru interinu Ensinu Superiór, Siénsia no Kultura, Mariano Assanami Sabino, iha loron 15 fulan-outubru tinan 2026, partisipa iha lansamentu kursu no Departamentu foun sira kona-ba Istória no Psikolojia iha Fakuldade Filozofia no Siénsias Umanas (FFCH, sigla iha lian portugés), Universidade Nasionál Timor Lorosa’e (UNTL). Serimónia ne’e hala’o iha Salaun Ian Martin, iha instalasoins INFORDEPE, Dili, nu’udar parte ida hosi komemorasaun aniversáriu Fakuldade nian ba da-11. 

Kursu foun sira ne’e habelar oferta akadémika Fakuldade nian, ne’ebé durante tempu naruk hala’o ona ninia atividade akadémika liuhusi kursu Filozofia. Expansaun ba área Istória no Psikolojia ne’e loke oportunidade foun ba formasaun espesializada no peskiza sientífika.

Durante serimónia ne’e, Vise-Primeiru-Ministru kongratula UNTL no Fakuldade Filozofia no Siénsias Umanas ba kriasaun kursu foun rua-ne’e, no mós reafirma apoiu Governu nian ba hadi’a kualidade ensinu superiór no hametin integrasaun akadémika iha espasu ASEAN.

Orientasaun ida-ne’e tama iha Programa Governu Konstitusionál da-9 nian, ne’ebé fó prioridade ba dezenvolvimentu kapitál umanu liuhusi hadi’a kualidade no asesu ba edukasaun, hanesan instrumentu ba dezenvolvimentu sosiál no ekonómiku nasionál.

Iha ninia intervensaun, Mariano Assanami Sabino destaka mós papél ensinu Istória nian iha formasaun ba jerasaun foun sira, hodi salienta katak koñesimentu istóriku ne’e permite atu kompriende orijen sira, hametin identidade no sai matadalan ba futuru.

Reitór UNTL, Joviano António da Costa destaka katak dezenvolvimentu ba área Istória no Psikolojia ne’e loke posibilidade foun ba formasaun espesializada no peskiza ne’ebé, relasiona ho kualifikasaun dosentes no dezenvolvimentu programa kurrikulár sira ne’ebé tuir nesesidade Timor-Leste nian.

Dekanu Fakuldade Filozofia no Siénsias Umanas, Faustino Soares subliña katak abertura ba kursu foun ne’e habelar oferta formativa ba Fakuldade ne’e no hametin prezensa siénsias umanas iha ensinu superiór iha Timor-Leste.

Serimónia ne’e konta mós partisipasaun hosi Diretora Eskritóriu Rejionál UNESCO nian iha Jakarta, Maki Katsuno-Hayashikawa, reprezentantes UNESCO iha Timor-Leste, responsavel sira hosi UNTL, reprezentantes husi  instituisoins parseiras, dosentes, peskizadores, funsionárius no estudantes.

Iha okaziaun ne’ebé hanesan, UNTL no Centro Nacional Chega! asina akordu kooperasaun ida iha área dezenvolvimentu kurrikulár, rekursus ba ensinu no peskiza konjunta, ne’ebé foka ba kursu foun Istória no Psikolojia.

Kooperasaun ne’e inklui área sira hanesan, apoiu ba Departamentu Istória iha Fakuldade Filozofia no Siénsia Umanas ba integrasaun konteúdu sira ne’ebé relasiona ho istória, direitus umanus, justisa ba tranzisaun no edukasaun ba pás iha prosesu ensinu no aprendizajen.

Ho lansamentu ba Departamentu Istória no Psikolojia, Fakuldade Filozofia no Siénsias umanas habelar ninia oferta akadémika iha área siénsias umanas.