Governu Timor-Leste

Iha loron 15 fulan-outubru tinan 2026, iha Jakarta, Governu Timor-Leste hasoru malu ho Ministru Investimentu no Dezenvolvimentu Industriál Indonézia no Prezidente Ezekutivu hosi Ajénsia Jestaun Investimentu Daya Anagata Nusantara (Danantara), Rosan Perkasa Roeslani, hodi halo avaliasaun ba progresu obra expansaun Aeroportu Internasionál Prezidente Nicolau Lobato nian no hametin koordenasaun ho Indonézia hodi aselera serbisu ne’ebé empreza estatál indonézia Waskita Karya hala’o hela, ne’ebé prevee sei remata iha tinan 2028. 

Delegasaun Timor-Leste xefia husi Vise-Primeiru-Ministru, Ministru Koordenadór Asuntus Ekonómikus no Ministru Turizmu no Ambiente, Francisco Kalbuadi Lay, ne’ebé akompaña husi Ministru Transportes no Komunikasoins, Miguel Marques Gonçalves Manetelu, no mós Vise-Ministru Komérsiu no Indústria, Augusto Júnior Trindade.

Iha enkontru ne’e, Governu Timor-Leste hato’o ninia preokupasaun kona-ba ritmu ezekusaun serbisu iha terrenu no solisita apoiu husi autoridade indonézia atu aselera obra sira ne’e. Rosan Perkasa Roeslani hato’o disponibilidade Indonézia nian atu apoia Waskita Karya hodi kumpre kalendáriu ne’ebé prevee ona.

Danantara hanesan ajénsia estatál Indonézia nian ne’ebé responsavel ba jestaun investimentu no partisipasaun Estadu  nian iha empreza públika sira. Waskita Karya integra iha estrutura emprezariál ida-ne’e liuhusi PT Danantara Asset Management, ne’ebé kaer partisipasaun barak liu iha empreza ne’e. Relasaun institusionál ida-ne’e sai baze ba abordajen Governu Timor-Leste nian ba Danantara atu reforsa akompañamentu ba ezekusaun projetu.

Sorumutu ne’e fó kontinuasaun ba akompañamentu ne’ebé Governu hala’o ona hodi ezekuta projetu ne’e. Iha fulan-agostu tinan ida-ne’e, Francisco Kalbuadi Lay no Miguel Manetelu, hasoru malu iha Dili, ho reprezentante sira husi Waskita Karya, Administrasaun Aeroportu no Navegasaun Aérea Timor-Leste (ANATL), no mós ekipa ne’ebé responsavel ba jestaun projetu hodi avalia progresu husi obras no dezafius ba ninia ezekusaun.

Waskita Karya maka responsavel ba parte expansaun pista no konstrusaun ba infraestruturas aeroportuárias ne’ebé iha relasaun, iha ámbitu kontratu konsesaun (dezeñu) no konstrusaun ho valór besik dolar amerikanu millaun 72,5, ne’ebé integra iha projetu ne’ebé hetan apoiu husi Banku Aziátiku Dezenvolvimentu (ADB).

Intervensaun sira ne’e hanesan parte ida iha  programa dezenvolvimentu no modernizasaun ba Aeroportu Internasionál Prezidente Nicolau Lobato ne’ebé luan liu, ne’ebé inklui komponente oioin ne’ebé apoia husi parseiru dezenvolvimentu sira, hanesan konstrusaun ba terminál pasajeirus foun ida.

Projetu ne’e ho objetivu atu reforsa kapasidade no kondisaun operasionál prinsipál aeroportu internasionál nian iha país ne’e, iha kontestu kreximentu ba ligasaun aéreas no preparasaun Timor-Leste nian hodi asume Prezidénsia ASEAN iha 2029.

Governu sei kontinua akompaña ezekusaun husi komponente oioin projetu ne’e nian no koordena ho parseiru sira ne’ebé envolve atu kumpre kalendáriu implementasaun ida-idak nian.